TURA: Songadam nokadamrango donggipa nokdang ge·antinan bijolirangko sale on·na gita ma·mong sorkari, dingtang dingtang scheme-rangko ra·gate on·engoba Tikrikilla jolo donggipa Debragre songni bang·a nokdangrangan bijoliko man·tokkujaenga ine Tikrikilla-ni Nokma & Gaonbura Association aro Debragre songni manderang parakatenba, ma·mong sorkarini ra·gate on·gipa dingtang dingtang scheme-rangchi ia songni manderangnaba bijoliko sale on·china gita MePDCL (Distribution) Phulbari sub-division-ni assistant executive engineer-na sedoataha.
Nokma & Gaonbura Association-ni convenor Walseng Sangma-ni parakatani gitade, India a·songni ning·o donggipa songadam nokadamrangna bijoliko on·na gita Rural Electrification Policy-ko ma·mong sorkarini ra·gatani ja·man, Electricity Act 2003-ni ning·o ma·mong sorkari, dingtang dingtang songrango donggipa nokdangrangna bijolirangko sale on·na a·bachengahachim aro uandaken Rajiv Gandhi Grameen Vidyutikaran Yojana (RGGVY), Deen Dayal Upadhyaya Gram Jyoti Yojana (DDUGJY) aro Pradhan Mantri Sahyog Bijli Har Ghar Yojana (PMSBHGY) scheme-rangko ra·gate songni nokni manderangna bijolirangko sale on·ahaoba Debragre songo donggipa manderangde ia scheme-rangni namgnirangko man·pajaengachim.
“National Electricity Policy 2005-2006-ko ra·gatani ja·manoba diltubatsranggipa songrangon bijolirangko man·tokahachim indiba Debragre songo te 50-na baten nokdangrang andalao dongna nangtokkuenga. Iani ja·mano ma·mong sorkarini ra·gatgipa scheme-ni ning·o Debragre songni manderangnaba bijoliko sale on·gnok ine official-rang ku·chakenba, 2019 bilsio digital metre box-kode ra·baahachim indiba da·alonan bijolikode sale on·na dongkujaenga,” ine Sangma parakatenba, ia songni manderangna ta·raken ma·mong sorkarini ra·gatgipa scheme-rangchi bijoliko sokate on·china MeECL aro Power department-ni official-rangko didiataha.
