TURA: West Garo Hills a·jani ning·o donggipa Bhaitbari community health centre (CHC)-ni medical & health officer Dr Mukta Miah-ko maming a·sel gri sorkari, Mahendraganj CHC-ona ra·jitangenga ine All Meghalaya Minorities Students Union (AMMSU) parakatenba, ia doctor-na on·gipa transfer order-ko ra·pilchina gita sorkario dabiangaha.
Iani bidingo Meghalaya a·dokni Health & Family Welfare Minister-na sedoatengon, Bhaitbari CHC-ni medical & health officer ong·e kamko ka·anggipa Dr Miah, saksa kakketo kamtangko ka·gipa aro salo konta 24 manderangna dangdike on·na kusi ong·gipa mande ong·a ine AMMSU-ni dilgiparang parakatenba, ia doctor-ko Mahendraganj CHC-ona ra·anggija Bhaitbari CHC-on donkuchina gita didiataha.
“Dr Mukta Miah-ni kosako darangba matnangani ba badi ka·anirang dongjachim indiba da·o gita COVID-19 sajinmani somoio ugita dakgipa doctor-ko gipin biapona apjitanganiara ia jolo songdongenggipa manderangna namen dukni katta ong·enga. Ua saksa kakketo kamtangko ka·gipa aro salo konta 24 manderangna dangdike on·na kusi ong·gipa doctor ong·ani gimin chinga uko Bhaitbari CHC-on donkuchina dabienga,” ine AMMSU-ni president parakataha.
