TURA: South Garo Hills a·jani song damgni, chong·motan Upper Nekora aro Upper Pasgaon songrango JIO tower-ko bilsi gittammangna skangan songahaoba da·onan network-ko on·kujaenga ine Garo Students Union (GSU) Moheshkola regional unit parakataha.’
Iani bidingo Tura-o donggipa Reliance JIO-ni manager-na sedoatengon, bilsi gittamna skangan ia songrango JIO tower-ko songahachim indiba da·onan network-ko on·kujaengani a·sel songni manderang neng·nikanirangko chagrongna nangtokenga ine GSU Moheshkola regional unit-ni dilgiparang parakataha.
“Da·ororo skul aro college-rango poraienggipa chatro chatrirangba internet gitasa class aro porikkarangko ra·na nangenga indiba ia song damgnio network-ko man·jaengani a·sel poraienggipa chatro chatrirangsan ong·aigija dingtang dingtang kamrangna internet-ko jakkalenggipa manderangba neng·nikanirangko chagrongna nangtokenga,” ine GSU Moheshkola unit-ni president Tirotsingh Ch Marak parakatenba, ia song damgnina ta·raken JIO network-ko on·china Reliance Jio-ni manager-ko didiataha.
