TURA: North Eastern Hill University (NEHU)-ko kosako jingjengatenggipa NGO-rangko Shillong-o donggipa NEHU-ni Vice Chancellor P Shukla, gronge agangrikna ku·rachakatahani gimin Sukrobar sal dipet jingjengataniko All Garo Hills Joint Action Committee (AGHJAC) ra·galatpilaha.
Iani bidingo kobor setimgiparangna seachi u·iatengon, NEHU-ni Vice Chancellor P Shukla, Tura-ona re·bae re·baenggipa December-ni 21 aro 22 tarikrango jingjengatenggipa NGO-rangni dilgiparangko gronge agangrikna ku·rachakaniko on·atahani gimin brigipa salni ja·man jingjengataniko ra·galatchengaha ine AGHJAC-ni convenor Balkarin Ch Marak parakataha.
“NEHU Tura campus-o gapatna nanganirangko chingni dabienggipani bidingo NEHU-ni Vice Chancellor, chingko gronge agangrikna ku·rachakaniko on·atahani giminsa chinga chingni jingjengataniko dontongatchengenga indiba chingni agangrikanio chinga chu·ongnikaniko man·jagenchimode je somoioba chinga jingjengataniko a·bachengatpiltaigen,” ine Marak parakataha.
AGHJAC-ni dingtang dingtang dabianirangko NEHU-ni dilgiparang knachakjaengani gimin ia committee-ni ning·o donggipa dingtang dingtang dolrang, Sombar salonin NEHU Tura campus-o kam ka·aniko champengate jingjengatna a·bachengahachim ine nikna man·a.
NEHU Tura campus-ni pro-vice chancellor-na Tribal-rangoniko songchina, Tura campus-o A·chik aro Tribal chatro chatrirangna biaprangko on·chengchina, contractual basis kam ka·enggiparangko regularise ka·china, hostel, quarter aro uandakgipa building-rangko chu·onga gita rike on·china aro chatro chatrirangna namgni ong·nagipa gipin subject-rangkoba Tura campus-o a·bachengatchina gita NGO-rang dabiengachim ine nikna man·a.
