AMPATI: Re·anggipa Budbar aro Bristibar salrango salgnina South West Garo Hills a·jani dingtang dingtang biaprango special campaign-ko ong·ate COVID-19-ni tikarangko su·anio gimik sak 5271 manderang, tikarangko su·e ra·rikna cholko man·tokaha.
Ia special campaign-ko ong·atanio election-ni bewalo COVID-ni tikarangko su·e on·angaha aro tika su·gipa dolrang, Budbar pring 7:00 bajionin an·tangtangna tikatgimin polling station-rangona re·ange walni 8:00 bajimangona kingking tikarangko su·e on·tokaha.
Tikarangko salgnina kingking election-ni bewalo su·e on·angahani gimin ia salgnion manderang, an·tangtangni sepangbatgipa polling station-rangona re·ange tikarangko su·e ra·rikna gita cholko man·tokaha.
Ia special campaign-ko ong·atanio dingtang dingtang department-rangoniko seoka man·gipa official-rang, an·tangtangni polling station-rango supervisor ong·e kamrangko ka·angaha aro salgnion tika su·anirangko nirokangaha. Songni nokni manderangkoba ia supervisor-rangan, tikarangko su·e ra·china gita diditokaha.
Meghalaya a·dokoba da·o Krismasna skangan COVID-ni tika su·aniko matchotatna miksongengani gimin a·dokni pilak biaprangon iandake program-rangko ong·atenba, tika su·kugijagipa manderangna tikarangko su·e on·angenga ine nikna man·a.
Special campaign-ko ong·atanio SWGH-ni sak 5271 manderang tika su·rika
Date:
Share post:
