SHILLONG: Meghalaya a·dokoba COVID-19-ni ‘Omicron’ rokomko warachaksona gita a·dok sorkari mikraken kam ka·soenga ine a·dokni Health Minister James PK Sangma, Sonibar salo parakataha.
A·doko Omicron rokomko chel·chaksona gita sorkari, kamrangko nipiltaina nanga aro chu·ongnike dongna nangja ine All India Trinamool Congress (AITC)-ni ku·pattianiko jegalatengon, “Chingni dakna nanggni kamrangko chingna opposition dol ba ugita dakgipa dolrang agane on·na nangja. Sorkari dakna nanggni kamrangko dakenga aro sajinmako warachakna gita ja·kurangko de·samsoaha,” ine Sangma parakataha.
Meghalaya sorkari obostarangko name nirikkienga aro a·dokni Chief Secretary an·tangan kamrangko nipilmanaha ineba Health Minister parakataha.
“A·doko ong·enga obostarangko Health department, nirikkijringenga,” ine Sangma aganaha.
Da·o dipet India a·songni salgro salaram jolo Omicron-ko man·giparang sakgnisan ong·kuengoba Health department chu·ongnike dongna nangja aro mikrake kamrangko ka·sona nanga ine Meghalaya a·doko AITC-ni spokesperson HM Shangpliang-ni aganahani gimin Health Minister, ia kattarangko aganskaaha.
Omicron-ko warachaksona nanga gita ja·kurangko de·samsochina aro manderangko chu·gimik tika su·china gita AITC-ni dilgipa, a·dok sorkari aro Health department-na ku·pattianiko on·angahachim ine nikna man·a.
Meghalaya a·dokni cholgugarango aro mongsongbate Umling entry point aro gipin biaprangoba gipin biaprangoni re·baenggipa manderangko mikrakbate niroksochina gitaba AITC, sorkariko didiangahachim.
