SHILLONG: Shillong songjinmao Excise Commissioner-ni office nokko rikna gita mijal Mongolbar salo, a·dokni Chief Minister Conrad Sangma aro Excise Minister Kyrmen Shylla, pangchakaniko songe on·angaha.
Excise Commissioner-ni office nokna pangchakaniko songe on·angani somoio a·dokni Chief Minister, jinmana aganprakangengon, indita bilsirangna a·doko Excise department, an·tangni office nok gri kamrangko ka·na nangahaoba da·o bon·kame office nokko rikna cholko man·paengaha ine an·tangni kusi ong·aniko parakataha.
“Ia office nokko ru·uta bilsirangonin rikna miksonganirang dongachim indiba da·o Meghalaya a·dok bilsi 50 gapna sipilengahaosa Excise department, an·tangni office nokko man·na siengaha. Meghalaya a·dokna tangka paisarangko man·bate on·giparangoni Excise department-ba ge·sa ong·paachim indiba indita bilsirangna ia department, an·tangni office nok gri kamrangko ka·na nangaha. Ia office nokko rika matchotahaode ian Secretariat jolo nambatsranggipa nokrangoni te·sa ong·gnok,” ine Sangma aganaha.
COVID-19 giproroani a·sel a·doko tangka paisani gita neng·nikanirangko chagrongna nangengmiting somoirangoba Excise department, a·dokna tangka paisarangko man·bae on·na raken kamko ka·aha ineba ua Excise-o kam ka·giparangko mittelpilangaha.
Excise department-o dingtang dingtang kamrangko a·bachengatengani gimin a·doko chu tarienggipa manderangnaba cholrangko on·na man·gnok ineba Chief Minister aganaha.
“Meghalaya a·doko churangko tarigiparang bang·en dongani gimin joltango tarigipa churangko niamo ong·atna gita ia department ja·kuko de·aha. Joltango tarigipa churangna chinga kajinarangko komiate chu tariani kamrangko namdapatna miksongenga,” ine Sangma parakataha.
Ia office nokna pangchakaniko songe on·angani somoio a·dokni Excise Minister Kyrmen Shylla-ba jinmana aganprakengon, a·doko tarigipa churangko aro gipin biaprangoniko ra·baenggipa churangkoba porikka ra·e nina gita ia Excise Commissioner-ni gita building-o Excise department-ni Testing Laboratory-koba dongen ine parakataha.
Da·o dipet a·dokona ra·baenggipa churangko Assam sorkarini Chemical Examiner-sa porikka ra·e niengani gimin ia gital building-o Testing Laboratory-ko kuliahaode a·doktangon porikka ra·e nina man·gnok ineba Excise Minister parakataha.
Ia tom·anio a·dokni Chief Minister, dingtangmancha Excise department-ni logo-koba oprake on·angjolaha.
