SHILLONG: Meghalaya a·doko bijoli sualani bewalko namdapatna gita gong kror 2500-ko man·na ka·dongenggipa aro a·doko meter toani bewalko chu·gimik 100 percent gapatna ka·dongenggipa Revamped Distribution Sector Sector Scheme-ni action plan-ko Mongolbar salo, a·dokni Cabinet ra·chakangaha.
Cabinet tom·a matchotani ja·mano kobor ra·timgipa manderang baksa agangrikengon, ia project-na a·dok sorkari, gong kror 2500-ni proposal-ko on·enga aro ia scheme-ko Power Ministry jako ra·gatenba, bilsi 5-ni gisepo distribution sector-ko namdapatgen ine a·dokni Chief Minister Conrad Sangma parakataha.
Ia scheme-ko India a·song gimiko ra·gatna gita ma·mong sorkari, gong kror lak 3-na baten tangkarangko chamahachim ine nikna man·a.
Chief Minister-ni parakatani gitade, ia scheme-ni ning·o Meghalaya a·dok, metre-prako gong 1350-mangko subsidy dake man·gen aro iana kamrangko ka·anio 90:10 bewalo India sorkarini dakchakaniko man·gen.
Ia scheme-ni 13 ba 14 percent-kode smart metre-chi chu·sokatgen aro bangkikode bijoli on·aniko namdapatna jakkalanggen ineba Chief Minister parakataha.
Ia scheme-ni kamrangko ka·na gita a·dok sorkari, ja 8 ba ja 9-mangko nangnaba gnang aro ia scheme-ko mikkang bilsini bon·angachibara a·bachengatgen ine talataniko on·angengon, ia scheme-ko 2023 bilsini gisepo matchotatgenchimode a·dok sorkari, ma·mongoniko tangka paisarangko man·dapgen ine Chief Minister parakataha.
