SHILLONG: Meghalaya a·doko Congress dolba, National People’s Party (NPP)-chi dilenggipa Meghalaya Democratic Alliance (MDA)-ni kamrango dakchakanirangko on·pana parakatani ja·man MDA sorkarini kamo Congress dolni dakchakaniko nangjawa ine a·dokni BJP dol parakatskaaha.
Ma·mongo BJP-chi dilenggipa National Democratic Alliance (NDA) sorkario NPP bak ong·paenga gitan Meghalaya a·dokoba NPP-chi dilenggipa MDA sorkario BJP-ba bak ong·skaengachim ine nikna man·a.
Indake ong·engon, Meghalaya a·doko MDA sorkarini kamrango Congress dolna chakpaanirangko on·na parakataniko a·dokni BJP dol jegalatskaenba, MDA sorkarini kamrango Congress-ni bakrime dakchakanirangko nangjawa ine parakatskaaha.
“Congress dolni dakchakaniko on·na ja·ku de·aniko anga an·tangde ra·chakna man·jawa maina uamang a·bachengonin sorkarini kamrangko champengna jotton ka·enga. Meghalaya a·doko Inner Line Permit (ILP) aro uandakgipa gipin kamrangna chinga Congress dolni dakchakani grian ja·ku de·enga aro mikkangchiba chinga uamangko nangjawa,” ine Budbar salo, BJP-ni state president Ernest Mawrie, kobor ra·timgiparangna parakataha.
Congress dolni MLA-rang, doltangko wate gipin dolo napjaskal BJP, Congress baksa kamrangko apsan ka·rimna man·jawa ineba BJP-ni dilgipa parakataha.
“Matcha aro matchokde maming saloba apsan chiringoniko chi ringna man·jawa ine anga a·bachengonin aganenga aro da·oba iakon agankuenga,” ine Mawrie aganaha.
MDA-o BJP dongenga dipetde MDA baksa bakrimna man·jawa ine adita salrangna skangsan Congress dolni dilgiparangba parakatahachim ine nikna man·a.
Congress dolni MLA-rang, MDA-o bakrimna miksonge ong·ja indiba a·doko nangenggipa dingtang dingtang kamrango bakrimaniko on·na gitasa adita salrangna skang, NPP-ni national president aro Meghalaya a·dokni Chief Minister Conrad Sangma-ko grongeaha ineba Congress dolni dilgiparang, talataniko on·angahachim.
