SHILLONG: Meghalaya Engineering College-ko rikani re·baenggipa 2022 bilsini March jaode matchotnaba dongaha ine kobor on·timgiparang u·iataha.
Shillong songjinmani Mawlai-o donggipa Polytechnic-ko chu·gimik engineering college-ona ra·doatskana gita iana nokrangko taridapengahachim ine nikna man·a.
Ia engineering college-ko rikna gita a·dok sorkari, gong kror 21 tangkarangko chame on·ahachim.
PWD (Building)-o kam ka·enggipa official saksani kobor ra·timgiparangna u·iatani gitade, da·o ia college-ko rikani 90 percent-ni gitade matchotmanaha.
“Ia bilsini March jaona kingkingde kamrang 40 percent-ni gitasan matchotkuengachim indiba batanggimin jachetni gisepo COVID-19 sajinmani a·sel dingtang dingtang neng·nikanirangko chagrongna nanggenchimoba chinga kamrangko ta·raken ka·na man·aha. Ia pilakan Additional Chief Secretary DP Wahlang-ni dilanichi official-rang aro kamko man·gipa contractor-ni rakbee kamko ka·ani a·sel ong·aha,” ine PWD official aganaha.
Ia college-ko uamang Meghalaya a·dokni bilsi 50 gapaniko manina skangan matchotatna jotton ka·ahachim indiba kam ka·giparang chu·ongjahani a·sel somoi gita matchotatna man·jaha ineba official parakataha.
PWD (Building) official-ni parakatani gitade, ia engineering college-ko rikanio kam ka·gipa sak 120 labour-rang pilakan joltangni manderangan ong·achim.
Ia nokko rika matchotahaon, college-o kam ka·giparangkode Meghalaya Public Service Commission (MPSC)-ni gita ra·skagen ine Education department-ni Additional Chief Secretary DP Wahlang parakatskaaha.
Da·o dipet Meghalaya a·doko engineering college dongkujani a·selan engineering poraienggipa chatro chatrirang, gipin a·dokrangonasa re·ange poraina nangtokkuengachim.
M’laya Engineer College-ko 2022 bilsini March jao matchotnaba gnang
Date:
Share post:
