SHILLONG: Bharatiya Janata Party (BJP)-ni state president Ernest Mawrie-ko ra·galchina dabienggiparangni kosako West aro East Jaintia Hills a·jani BJP membor-rang jegalatenba, state president-na an·tangtangni chakpaaniko parakataha.
West Jaintia Hills BJP-ni general secretary Lakhon Dhkar-ni seachi parakatani gitade, adita salrangna skang uamang WJH-ni party president Chaphrang Lyngdoh-ni dilanichi tom·aniko ong·atangenba, BJP-ni state president Ernest Mawrie-ni kosako chakatenggipa membor-rangni dabianiko raken jegalangtokaha.
BJP-ni state president Ernest Mawrie-na chakpaaniko parakatengon, “Ernest Mawrie-ni dilanichisa Meghalaya a·doko BJP dol bilakbarorona man·enga aro uni dilanichisa bang·a Morcha aro Mandal dilgiparangba ka·dongna man·e da·o re·baenggipa bilsirango ong·atna sienggipa election-oba bang·bata seat-rangkon chena ka·dongani dongenga,” ine West Jaintia Hills-ni BJP membor-rang parakataha.
BJP-ni state president-ko matnange dongaianichide maming namgniko ra·bana man·jawa indiba ku·cholsan kamko ka·anichisa a·doko BJP dol bilakbatna man·gen ineba uamang parakataha.
Adita salrangna skangsan, BJP dolko dilenggipa manderangoni state president-ni kosako chakate uko ra·galchina gita dabiangtokahachim ine nikna man·a.
BJP-ni state president-ko kamoniko ra·galjagenchimode uamang jinma BJP-oni ong·katgrimgen ineba uamang ka·mikkenataniko on·angahachim.
