SHILLONG: Bristibar salo, Hynniewtrep National Liberation Council (HNLC) bobil dolni Junel Tongper ba jekon June ineba mingklakachim, East Jaintia Hills a·jani Umkiang Border Outpost-o BSF dolna an·tangko bame on·eaha.
Ua an·tangko BSF Meghalaya Frontier-ni Inspector General Inderjit Singh Rana-ni mikkango an·tangko bame on·eaha.
Ia mandeara, Umkiang jolo donggipa Lumphyllut songoni ong·achim aro ua East Jaintia Hills a·jao HNLC bobil dolni area commander ong·e kamko ka·engachim. Ua 2010 bilsio HNLC bobil dolo napchengaha aro training-ko ra·ani ja·man ua dingtang dingtang biaprango ong·gija kamrangko ka·na a·bachengaha. 2015 bilsio ia mandeko, Meghalaya a·dokni police-rang rim·aha indiba uko jamino watpilani ja·man ua gimachipahachim. Indake ong·genchimoba, 2020 bilsini November jao ua HNLC bobil dolo nappiltaiaha aro uni ja·man ua Bangladesh a·songni Moulvibazar a·jani ning·o donggipa Panaipunjee songo donge HNLC bobil dolna kamko ka·aha.
Tongper-ni BSF dolna parake on·ani gitade, HNLC bobil dolni manderang, lekka pora donggijagipa aro kamgri ong·e dongenggipa chadamberangkosa bobil dolo rimnapengachim aro uandaken uaba uamangni dilsretaniko man·e bobil dolo napangaha aro ma·mani ong·gija kamrangko ka·aha. Uni cholgri ong·aniko aro lekka pora donggijaniko chol ra·e HNLC bobil dolni dilgiparang, uko HNLC dolo rimnapenba ma·manti ong·gija kamrangna jakkalaha ineba ua BSF dolna parakaha.
Indake ong·engon, dilsretako man·e bobil dolrango napanggipa chadamberangko ong·a ramaona rimbapilna gita BSF kam ka·enga ine BSF Meghalaya Frontier-ni IG Rana parakataha. Bame on·eani ja·man iandakgipa chadamberangna janggi tangani cholrangko on·na gita jakni kam aro ma·manti dake cha·ani cholrangko on·na BSF ku·rachakenga ineba BSF official parakataha.
Dilsretako man·e bobil dolrango napanggipa chadamberangoni bang·batan da·o nama ramaona re·bapilna miksongtokengaha ineba Rana parakataha.
Ia chadambeko tom·tomaona rimbapilahani gimin uni nokdangba BSF dolko mittelpilangaha.
