TURA: North Garo Hills a·jao donggipa Damas Youth Forum-ni bilsi 25 gapaniko re·anggipa December-ni 29 tariko Damas songo maniangaha aro ia dolni bilsi 25 gapaniko maniani bak gita dingtang dingtang program-rang, jekai jatni kal·susaani, jatni bijakrangko song·susaani, jatni gitrangko ring·susaani, rock concert aro uandakgipa program-rangko ong·atangaha.
Ia manianio Bajengdoba-ni MLA Pongseng Marak mongsonggipa sokgipa ong·e bakko ra·angaha aro ia manianio jolni MDC Pardinand D Shira-ba dongpae bak ra·angaha.
Attamni bako ‘Riprap’ dol gitrangko ring·e manderangko an·saoatangbeaha aro unbaksana RC Rabie aro gipinrangba gitrangko ring·e manderangko an·saoatangaha.
DYF-ko dilenggipa manderangni u·iatani gitade, bilsiantian uamang Damas songo Nokpante Festival-ko ong·atrongachim indiba re·anggipa bilsio COVID-19 sajinmani a·sel ia festival-ko ong·atna man·jahani gimin ia bilsio DYF-ni bilsi 25 gapaniko manijole ia Nokpante Festival-ko ong·atskana cholko man·aha.
Da·o dipet Nokpante Festival-ko ong·atna gita DYF, sorkarioniko maming dakchakanirangko man·kujaengani gimin salsanasan ia festival-ko ong·atna man·engkua ineba DYF-ni dilgiparang parakataha.
