TURA: Meghalaya a·dokni mongsonggipa jat gittam, chong·motan Garo, Khasi aro Jaintia-rangna, jatni krisa Job Reservation Policy-ko tarie Garorangna 40%, Khasi-Jaintiarangna 40% aro gipin jatrangna 20%-ko kange donmanaha ine Garoland State Movement Committee (GSMC) parakatenba, ia job reservation policy-ko pe·jachina gita National People’s Party (NPP)-chi dilenggipa MDA sorkariko didiangaha.
GSMC-ni parakatani gitade, India a·songo A·chikrangba Tribal jatrangoni jatsa ong·pae Constitution-ni ning·o pilakni gitan bilko man·pagipa jat ong·enga aro uandaken Meghalaya a·doko songdongenggipa jatgittamoni A·chikrangba jatsa ong·pae pilakni gitan bil donggiparang ong·a.
Indake ong·engon, Meghalaya a·dokko man·chengaonin A·chikrangba, Khasi, Jaintia aro gipin jatrang baksa meli nangrimao janggi tangbaenggipa jat ong·e jatna on·gimin bilko rakkina bil donggiparang ong·a ine GSMC parakatenba, Job Reservation Policy-o on·gimin gita 40%-ko man·angkuna bil donga ine parakataha.
“Uni gimin ia on·gimin bilko dingtangatna ba taridapna gita chinga Conrad Sangma-chi dilenggipa sorkarina maming dakeba on·jawa aro batesa A·chikrangna bil aro cholrangko on·dapchina krenge kamko ka·angkugen,” ine GSMC-ni ku·wattimgipa Ryan Ch Marak parakataha.
