SHILLONG: An·tangko BJP-ni state president ong·aoniko ra·galchina dabienggipa BJP-ni mitam membor-rang Congress-o napangaha aro mitamde All India Trinamool Congress (AITC)-o napangenga ine Meghalaya a·dokni BJP president Ernest Mawrie a·kangataha.
Batanggimin somoirangonin Meghalaya a·dokni BJP dol ning·o meligrikgijanirangko nikna man·engahachim.
“Angni kosako chakatenggipa membor-rangoni bang·batan doltango dongjawaha ine anga ma·siaha. Uamangoni mitamrangde Congress-o napangaha aro mitamrangde AITC-o napanggen,” ine an·tangko ra·galchina dabienggipa BJP membor-rangni gimin Mawrie aganaha.
Uni kosako chakatenggipa membor-rangni miksonganian BJP dolko ong·siatani ja·man wate katanian ong·enga ineba ua aganaha.
Da·o dipet uni kosako badi ka·anirangko ua darangonikoba knasona man·na dongkujachim ine janapatengon, uko darangba jegalani grian state president songahachim aro uni term 2023 bilsiosa bon·engachim ine Mawrie parakataha.
Mawrie-ni aganani gitade, ua BJP dolko Meghalaya a·doko bilakdapatnasa krenge kamko ka·engachim aro uni kosako chakatenggipa membor-rang baksaba ua agangrikna cholko on·ahachim.
“Ma·mongo dilgiparangni ge·etani gitasa anga kamko ka·enga aro anga chanchia uamangba angni kamo kusi ong·enga,” ine Mawrie aganaha.
Da·o dipet ua doltangna maming ong·gijako daka dongkujachim ine janapatengon, a·dokni office bearer-rang aro dingtang dingtang a·jani dilgiparangba unbaksa ong·enga ine BJP-ni state president parakataha.
“BJP-ni high command nangnikenga dipetde anga president-ni biapko ra·angkuaigen aro jensalo uamang angko kranikjaha unon anga biaptangko wataigen,” ine Mawrie aganaha.
Meghalaya a·doko BJP-ni dilgiparang meligrikna man·jaenga ine matnanganiko BJP-ni national president aro Meghalaya a·dokni in-charge M Chuba Ao-ba adita salrangna skangsan ku·chakahachim.
