SHILLONG: Meghalaya a·dokoba sakbonga manderang, COVID-19-ni gital Omicron rokomko man·aha aro ia sakbonga manderangara saksade Assam-oni aro sakbride East Khasi Hills aro Ri Bhoi a·jaoni ong·a ine kobor on·aha.
Positive ong·gipa sakbonga manderangni gimin talbate ma·sina ia manderangni sample-rangko porikka ra·e nichina watatenga ine janapatengon, ia manderang adita salrangna skangan COVID-19-na porikka ra·anio positive ong·aha indiba uamangni gimin ning·tubate porikka ra·ani report-ko Mongolbar salosa man·soaha ine health official-rang parakataha.
Omicron man·gipa mande sakbongaoni sakgnide Saiden-oni, saksade Langkyrding-oni, saksade Happy Valley-oni aro saksade Laitumkhrah-oni ong·a ineba health official-rang parakataha.
A·doko Omicron positive ong·gipa sakbonga manderangoni saksade me·chik aro sakbride me·asarang ong·a ine janapatengon, East Khasi Hills a·jao positive ong·gipa manderangoni saksade United States-oni aro saksade New Delhi aro Assam-oni indiba Ri Bhoi a·jao positive ong·gipa mande sakgnide songreani bidingo maming see rakkianirang dongjachim ine health official-rang parakataha.
A·doko Omicron positive ong·gipa manderangoni bang·batan da·o sal 4-oni sal 8-nade dingtang nape dontokengaha ineba official-rang aganaha.
Indake ong·engon, ia manderang baksa contact donggipa gipin manderangkoba health official-rang sandienga aro uamang pilakkon porikka ra·e nigen ine u·iataha.