AMPATI: South West Garo Hills a·jani dingtang dingtang biaprangoba bilsi 15-oni bilsi 18 ong·gipa chadamberangna COVID-19-ni tikako Budbar sal dipet a·bachengataha indiba Garobadha primary health centre (PHC)-ode tika su·aniko January 3 tarik dipetan a·bachengskaaha.
South West Garo Hills a·jao bilsi 15-oni bilsi 18 ong·gipa chadamberangna tikarangko su·anio da·o dipet maming saa man·ani ba a·sel ong·anirangko knasona man·kujaenga.
Tika su·na man·enggipa chadamberang, an·tangtangni skul ID card, ration card ba Aadhar card-rangko ra·bana gita nangenga aro je chadamberangan iandakgipa ID card-rang dongjachim, uandakgipa chadamberangnade dingtang tika su·ani session-ko ong·atanggen ine kobor on·aha.
Meghalaya a·dokoba COVID-19-ni Omicron rokomko man·gipa manderang dongengahani gimin South West Garo Hills a·jaoba ia kenbegnigipa sabisini giproroaniko champengsona gita re·anggipa Mongolbar salo, South West Garo Hills a·jani Additional Deputy Commissioner AVD Shira, a·jao COVID-na songe dongimin District Task Force baksa tom·aniko ong·atangenba, tikarangko su·ani bidingo chanchirimangaha aro Section 144 CrPC-ni ning·o dingtang dingtang niamrangkoba ra·gate on·angjolaha.
