SHILLONG: Meghalaya a·doko GVK-EMRI kamrangko ka·na man·jaenga ong·ode bon·atsrangon nambatgen ine Meghalaya sorkari mikrakataniko on·angaha.
A·doko sagitikgipa ba a·sel ong·anirango saknaa man·gipa manderangna sannanirangko on·na aro hospital-rangona sokate on·na gita ia GVK-EMRI-ni 108 emergency service-ko ra·gatahachim indiba EMRI-o kam ka·giparang an·tangtangni dormaharangko bariatchina aro an·tangtangni kamko regularise ka·china dabie jingjengattokengani a·sel batanggimin salrangonin 108 emergency service kamrangko ka·jaengahachim.
Indake ong·engon, ia 108 emergency service-ni kamrangko ta·raken a·bachengatna man·jagenchimode ia EMRI-ko chalaienggipa company-ni contract-ko sorkari bon·atana agrede maming gipin chol dongjawaha ine mikrakataniko on·angaha.
Iani bidingo GVK-EMRI-ni dal·batgiparangna seachi u·iatengon, EMRI-o kam ka·enggipa manderangna 2021 bilsini October jaoni dormaharangko on·na man·na gita National Health Mission (NHM), tangka paisarangko on·dapatgen ine MCH&FW-ni additional director aro NHM-ni managing director parakataha.
“Ia sal somoirango COVID-ni gita rokom giprorotaiengahani gimin na·simang ta·raken kamrangko ka·piltaina nangenga. Na·simang kamrangko a·bachengpiltaina man·jagenchimode sorkari baksa songgigrikgipani Clause 13-o pangchake contract-ko ra·galpilna gita ja·kuko de·na nangao ga·akgen,” ine GVK-EMRI-ni dilgiparangna seatgipa chittio janapataha.
EMRI-oni koborko on·ani gitade, EMRI-o kam ka·giparangna gital dormahako February jaoni on·na siengachim indiba company-na on·gipa contract-ko sorkari ra·galpilgenchimode EMRI-o kam ka·enggiparang kamtangtangko gimaatskana nanggnok.
