TURA: Meghalaya a·dokni district council-rangna ma·mong sorkarini chamatgipa tangka paisarangko Garo Hills Autonomous District Council (GHADC)-o kam ka·enggiparangni dormaharangko on·na gita GHADC-o NPP-chi dilenggipa Executive Committee (EC) jakkalsrettaiaha ine kobor on·aha.
Koborko on·ani gitade, 15th Finance Commission-ni ning·o Meghalaya a·dokni songko nokko chalaienggiparangna ma·mong sorkari, Basic Grant-ni ning·o gong kror 91-ko aro Tied Grant-ni ning·o gong kror 91 tangkarangko, GHADC baksana KHADC aro JHADC-naba chamatahachim.
Ia Basic aro Tied Grant-rangko ma·mong sorkarini Finance Ministry changgni dake a·dokni damgittam autonomous district council (ADC)-rangna on·atahachim aro ia tangkarangkoara council-o kam ka·enggiparangni dormaharangko on·na ba council-ni gipin korosrangnaba jakkalna man·jachim ine kobor on·timgiparang u·iataha.
Ma·mong sorkarini chamatgipa tangka paisarangoni Tied Grant-kode songo noko rongtal an·talaniko rakkina, skatang a·pal re·aniko champengna, songo noko ringani chirangko on·na, mikka chirangko rakkina aro uandakgipa kamrangnasan jakkalna man·aiachim ineba kobor on·timgiparang u·iataha.
Indake ong·engon, ma·mong sorkarini chame on·atgipa tangka paisarangko re·anggipa bilsion GHADC-o kam ka·enggiparangni kam ka·gija jingjengatengmiting somoion a·dokni skotong Shillong songjinmaon dingtangatna a·bachengaha ine kobor on·timgiparang u·iatenba, ia tangkarangoniko komibeoba gong kror 20 tangkarangko kam ka·giparangni dormaharangko on·na gita jakkalsretaha ine parakataha.
GHADC-o maming kajinarangko man·jaengani a·sel aro sorkarioni tangka paisani gita maming dakchakanirang sokbajaengani a·sel 2021 bilsi bon·na skangba kam ka·giparangna jabrini dormaharangko on·na gita ia tangka paisarangko GHADC-ni CEM Benedic R Marak, niam gri jakkalsoaha ineba kobor on·timgiparang parakataha.
Koborko on·ani gitade, GHADC-na chamatgipa tangka paisarangko jakkalani bidingo name ma·sie ra·na gita da·o sorkarini gita audit-koba ka·engaha.
