TURA: West Garo Hills a·jaoba bilsi 15-oni bilsi 18 ong·gipa manderangko man·chape bilsi sokgimin pilak manderangnan COVID-ni tikarangko su·engkuani gimin aro Sombar sal dipet booster dose-koba su·na a·bachengatahani gimin mijal Sombar salni bako District Task Force-ni tom·aniko Tura Circuit House-ni conference hall-o tom·aniko ong·atangenba, tikarangko su·ani bidingo District Task Force-ni membor-rangna agan-talate on·angaha.
Ia tom·anio West Garo Hills a·jani Deputy Commissioner Ram Singh, jinmana aganprakengon, COVID-19-ni gital Omicron rokomara bilonge saatgipa sabisi ong·jagenchimoba ta·raken batrikrikgipa ong·ani gimin pilakan mikrakbee dongna nanga aro COVID-ko warachakna dongimin niamrangko ja·rikna nanga ine aganangaha.
West Garo Hills a·jao COVID-ni tikako su·ani da·o 97 percent-mangni gitade matchotaha ine talataniko on·angengon, ma·manti saanirang donge bilsi 60 batgipa manderangko aro gnigipa pongko su·aoni jasku ong·gimin pilak manderangkon booster dose-koba ra·china gita Deputy Commissioner didiangaha.
Ia tom·anio Tura-ni Additional DMHO Dr Bijoy Dev Barma, COVID tikarangni gamchatgipa ong·ani gimin talataniko on·angskaengon, da·o dipet West Garo Hills a·jao COVID-ko man·giparang komitaipilahaoba mikkangchi ia sabisini batrikrikaniko champengna gita pilakan mikrake an·tangtangko naljoke rakkina nanga ine didianiko on·angaha.
Ia tom·anio Tura-ni DMCHO Dr Ivonne M Sangma, da·o ong·atenggipa tika su·ani program-ni gimin janapangskaengon, pilakni namgninan COVID-ni niamrangko ja·rikna nanga ine didianiko on·angaha.
Bilsi 15-oni bilsi 18 ong·gipa chadamberangna tika su·aniko January 20 tarikni gisepon matchotatna nangenga ine janapatengon, somoi gita tika su·aniko matchotatna man·na gita skulrangoba tikarangko su·na gita somoirangko sualanggen ine Dr Sangma parakataha. Bilsi 15-oni bilsi 18 ong·gipa chadamberangna gnigipa pongko sal 28-ni ja·manon su·na man·aigen ineba ua parakataha.
Tika su·enggipa biaprango COVID-ko warachakna dongimin niamrang, jekai mask-rangko gannani, saksa sakgipinoni chel·tanggrike dongani aro jakrangko rongtale rakkianirangko ja·rikchina didiangengon, West Garo Hills a·jaoba ma·manti saanirang donge bilsi 60 batgimin manderangna aro mikkango donge sabisiko warachakna kam ka·enggiparangnaba Booster Dose-ko on·na a·bachengataha ine Dr Sangma parakataha.
