SHILLONG: Adita salrangna skang a·gilsakko watanggipa, Shillong Chamber Choir-ni dilgipa Neil Nongkynrih-ni siao dongpagipa manderangoni sak 10 manderang COVID-19-na porikka ra·anio positive ong·aha ine kobor on·aha.
Kobor on·timgiparangni u·iatani gitade, Neil-ko gopna skang tom·anio dongpae COVID man·gipa sak 10 manderangara uni nokdangni manderangan ong·achim.
COVID-19 positive ong·gipa manderangoni Neil-ni abitang dal·batgipa aro uni segipaba ong·achim.
Indake ong·genchimoba, Neil Nongkynrih-ni bilsi 92 ong·gipa pagipa aro uni bilsi 82 ong·gipa ma·gipade negative ong·skaaha ine kobor on·timgiparang u·iataha.
Shillong Chamber Choir-ni dilgipa aro doka dam·anio a·gilsak gimik niksenggipa Neil Nongkynrih, re·anggipa Budbar attamo, Mumbai songjinmao a·gilsakko watangahachim. Uni manggisiko Sukrobar pringni Shillong songjinmaona ra·bapilaha aro uandaken uni manggisiko Sonibar salo gope galahachim.