SHILLONG: Assam aro Meghalaya a·dokni simarango meligrikna man·jaenggipa biaprangko namatna gita a·dok damgnini sorkarirang kam ka·engon, Budbar saloba, Meghalaya a·dokni Chief Minister Conrad Sangma aro Assam-ni Chief Minister Himanta Biswa Sarma, brigipa changna Assam a·dokni Koinadhara-o donggipa Assam State Guest House-o apsan asonge chanchirimangtaiaha.
Ia tom·anio a·dok damgnini minister-rang aro official-rangba dongpae bak ra·angtokaha.
Ia tom·anio dongpae bakko ra·angani ja·mano Meghalaya a·dokni Deputy Chief Minister Prestone Tynsong, kobor ra·timgipa manderang baksa agangrikengon, a·dok damgnini simarango meligrikna man·jaenggipa biaprangoni mitamkode re·baenggipa January 21 tariko Meghalaya Day-ko salon namatna ka·dongenga ine parakataha.
Assam aro Meghalaya a·dokni simarango meligrikna man·jaenggipa dam 12 biaprangoni damdokkode January 15 tarikni gisepon namatna gita a·dok damgnini sorkarirang miksonge kamko ka·engachim aro uandaken a·dok damgnini chief minister-rang, Budbar saloba brigipa changna apsan asonge iani bidingo agangrikangtaiaha.
Skanggipa bako damdok biaprangko namatchengna miksongengani gimin a·dok damgnini regional committee-rangan, ia biaprangni bidingo sandie report-rangko tarienba, sorkaritangtangna on·mantokahachim.
A·dok damgnini regional committee-rangan report-rangko on·manahani gimin ia damdok biaprangko ta·raken namatna ka·dongenga ine Tynsong parakataha.
Meghalaya a·dokni Deputy Chief Minister Prestone Tynsong-ni parakatani gitade, January 21 tariko Meghalaya a·dokni bilsi 50 gapaniko manina siengani gimin iana skangan uamang, a·dok damgnini simarango meligrikna man·jaenggipa biaprangoni mitamkode namatna ka·dongenga.
Assam aro M’laya-ni CM-rang brigipa changna simani bidingo agangriktaia
Date:
Share post:
