SHILLONG: Pul ge·anio gisik nanggipa manderangna Floriculture Expo-cum-Sale program-ko Budbar saloni a·bachenge Upper Shillong-o donggipa Institute of Bioresources & Sustainable Development (IBSD) Meghalaya Node-o ong·atenga.
India a·songni jakgitelko man·aoni bilsi 75 gapaniko maniani bak gita ia Floriculture Expo-ko Imphal-o donggipa IBSD-ni Director Prof Pulok K Mukherjee-ni dilanichi ong·atenga.
Ia Floriculture Expo-cum-Sale program-ko a·doko pul ge·na gisiko nanggipa manderangna, an·tangtangni ge·enggipa pulrangko mesokna aro palna sim·na man·na gita ong·atenga aro ia Expo-ko baditaba antirangna ong·atanggen ine IBSD-ni official-rang kobor on·aha.
Ia Floriculture Expo-cum-Sale program-ona re·baenggipa manderang, COVID-19-ko warachakna dongimin niamrangko ja·rikan baksana mask-rangko ganna nanggen aro ia program-ona chu·gimik tika su·gimin manderangsan re·bana man·aigen ineba official-rang u·iataha.
Ia IBSD Orchidarium-ko Budbar salona agrede pilak salrangon pring 10:00 bajioni attam 5:00 bajiona kulie dongen ineba u·iataha.
