SHILLONG: Meghalaya a·doko Inner Line Permit (ILP)-ko ra·gatchina dingtang dingtang dolrang dabitokengon, NPP-chi dilenggipa MDA sorkariba iako gualaha ong·ja aro ma·mong sorkario dabiengkua ine Bristibar salo, a·dokni Deputy Chief Minister Prestone Tynsong parakataha.
“Union Home Minister Amit Shah-ko grongna chol man·a changantian chinga a·dokna ILP-ko on·china uko didienga,” ine Tynsong parakataha.
Ia bilsio Meghalaya a·dokni bilsi 50 gapaniko maniengani gimin a·dokna boksis gita ILP-ko on·china re·anggipa Budbar salosan Congress dolni MLA PT Sawkmie, ma·mong sorkariko didiangahachim ine nikna man·a.
Meghalaya a·doko ILP-ko ra·gatchina gita dabie, re·anggipa 2019 bilsini December jaon Meghalaya Legislative Assembly, dingtangmancha resolution-ko ra·manahaoba da·onan a·dokna ILP-ko on·ani bidingo ma·mong sorkari, mamingkoba agankujaengachim.
A·doko ILP-ko ra·gatchina dabianiko ma·mong sorkari knachakna gisik nangjaengani gimin uamang, a·dokni Chief Minister-ko a·dokni sak 60 MLA-rang baksa Delhi-ona re·ange a·songni Prime Minister aro Union Home Minister baksa ILP-ni bidingo agangrikchina nangnikenga ineba Sawkmie parakataha.
