SHILLONG: South Garo Hills a·jani Nongal Jadigittim jolrangoniko Assam a·dokni company-rangna niam gri koela salna on·enga ine A·chik Holistic Awakening Movement (AHAM), Transport department aro Mining & Geology-ni commissioner baksana South Garo Hills a·jani deputy commissioner-ni kosako a·dokni chief secretary-na badi ka·doangaha.
Chief secretary-na sedoatgipa chittio AHAM-ni president Georgeprince Ch Momin-ni parakatani gitade, gipin biaprangoniko salbaenggipa koelarangko Gasuapara Land Customs Station gita Bangladesh a·songona salangna, re·anggipa 2021 bilsini December 1 tariko, Mining & Geology department-ni under secretary, Guwahati songjinmani Beltola jolo donggipa Jai Maa Coal Private Limited company-na see on·ahachim.
Momin-ni parakatani gitade, una skang, 2021 bilsini March 25 tariko, South Garo Hills a·jani deputy commissioner-ba koelarangko South Garo Hills aro headquarter Baghmara gita Gasuapara-ona salangna gita Assam a·dokni Dudhnoi jolo donggipa Maruti Fuel company-na on·skaahachim.
Uni ja·man 2021 bilsini December 1 tariko,Mineral Resources-ni director, South Garo Hills a·jani Rongding Awe, Dangsa Awe, Rongsa Awe, Gare Gittim aro Are Gittimo bikote donenggipa koelarangko salna gita dakkie man·gipa Babul S Marak-na challan-ko on·skaaha ineba AHAM parakataha.
Indake ong·engon, South Garo Hills a·jao niam gri koela badinganirangko name am·sandienba, niamo pangchake ia officer-rangna sastirangko on·china aro a·jao niam gri koela badinganiko champengatchina gita AHAM-ni president, a·dokni Chief Secretary-ko mol·molataha.
South Garo Hills a·jao niam gri koela badinganiko champengatna man·jagenchimode National Green Tribunal-ni kachario badi ka·skagen ineba AHAM-ni president mikrakataniko on·angaha.
Momin-ni parakatani gitade, gipin a·dokrangoniko salbaenggipa koela garirangko nirok sandianirangba dongjaenga aro badita koelarangko salbaengachim, uarangkoba nirok sandianirang dongjaengani a·selan ia jolrango niam gri koelarangko badingna man·engachim.