Tura-o nitoatenggipa gittimrangko CM nianga
‘Sorkarini a·arango nape dongenggiparangna dingtang cholko on·gen’
TURA: Re·baenggipa January 21 tariko Meghalaya a·dokni bilsi 50 gapaniko manina gita Tura jillani ning·o donggipa dingtang dingtang gittimrang, biaptangtangko nitoatan baksana rongtal an·talatanirangko daksotokengahani gimin Bristibar salo a·dokni Chief Minister Conrad Sangma, Tura jillani ning·o donggipa mitam biaprangko niangaha. Ia biaprangko niangani somoio Chief Minister baksana, West Garo Hills a·jani Deputy Commissioner Ram Singh, Tura Municipal Board (TMB)-ni Chief Executive Officer (CEO) Rikse R Marak aro gipin officer-rangba dongpae bak ra·angaha.
Ia biaprangko nieani somoio a·dokni Chief Minister, gittimo songdongenggipa manderangna aganprakengon, badiaba badiaba gittimrango manderang, sorkarini a·arangoba napdrae dongtokenga indiba ia a·arangara sorkarini gam-jinsa ong·ani gimin manderang ia biaprango songdongkamna niam dongja ine talataniko on·angenba, iandakgipa nokdangrangna sorkari dingtang cholrangko on·skana kam ka·enga ine ku·rachakaniko on·angaha.
“Tura aro Williamnagar jillani bang·bata gittimrangon manderang, sorkarini a·arangko nape dongtokenga aro ian sorkarina namen jajrengna nangani ong·enga. Sorkarini a·arangko maming dakeba manderangna pakwate on·na niam dongja aro iandakgipa gittimrango songdongenggipa manderangna sorkari dingtangmancha cholrangko on·skana gita kamko ka·enga. Iandakgipa a·arangko sorkari, maiba kamrangna nanggenchimode, ia biaprango songdongenggipa manderang sorkari baksa bakrimaniko on·na nanga aro sorkarini kamrangko matchotatna gita cholko on·na nanga,” ine Chief Minister aganaha.
An·tangtangni gittimrangko nitoatna aro rongtal an·tale rakkina gita ku·cholsan kamrangko ka·tokengani gimin Tura jillani manderangko mittelpilangengon, Meghalaya Day-ko manianiosan ong·aigija pangnan gittimtangtangko rongtale aro nitoe rakkiangkuchina gita ua dingtang dingtang gittimni manderangko didiangaha.
Comments are closed.