Regional committee-ni report-ko manderang ra·chakgenma jegalgen aganna man·kujawa: Tynsong

 

SHILLONG: Assam aro Meghalaya a·dokni simarango meligrikgijaniko namatna gita regional committee-rangni sorkarina ku·pattie on·aniko manderang namnikgenma jegalgen, da·o dipet aganna man·kujawa ine Meghalaya a·dokni Deputy Chief Minister Prestone Tynsong parakataha.

“Ru·utbea bilsirangna a·dok damgnini gisepo meligrikgijaniko namatna gita pangkamgipa cholko man·na chinga ka·dongenga. Regional committee-rangni report-rangko a·dok damgnini sorkarirangan ra·chakgen ine anga ka·dongenga,” ine Tynsong, kobor ra·timgiparangna aganaha.

Sorkaritangtangna report-rangko tarie on·anio manderangni nangnikanirangkoba regional committee-rang ra·ahama ine sing·on, iani giminsa uamang meligrikna man·jaenggipa biaprangoni damdok biaprangona re·ange am·sandianirangko dakaha ine a·dokni Deputy Chief Minister parakataha.

“A·dok damgnini sorkarirangan chu·gimik report-rangko man·gen aro ia chu·gimik report-rangko man·ahaon, a·dok damgnini chief minister-rang, apsan tom·e chanchirimtaigen,” ine Tynsong aganaha.

Tynsong-ni parakatani gitade, a·dok damgnini chief minister-rang bon·kame tom·ani ja·manosa Delhi-ona re·ange Union Home Minister Amit Shah-ko grongegen aro uni ja·man chief minister-rang, press conference-ko ong·ate jinmana u·iatnaba gnang.

A·dok damgninan report-ko on·na gita salgittam somoiko on·manaha ineba Tynsong parakataha.

A·dok damgnini simarango meligrikgijaniko namatna gita rakbee kamrangko ka·enga ine a·dok damgnini chief minister-rangko mittelpilangengon, “Batanggimin somoirango darang chief minister-rangan iani bidingo iandake agangrika dongkujachim aro ia biaprangko niea dongkujachim,” ine a·dokni Deputy Chief Minister parakataha.

Indake ong·engon, a·dok damgnini simarango meligrikgijaniko namatna ja·ku de·aniara namen namgipa kam ong·aha ine All India Trinamool Congress-Meghalaya (AITC-M)-ni dilgipa Charles Pyngrope-ba parakataha.

Ia ja·ku de·anichi a·dok damgnini gisepo pangkamgipa tom·tomaniko ra·bapilna man·gen ineba ua an·tangni ka·dongchakenganiko parakataha.