SHILLONG: A·dok sorkarini administrative building-rangko New Shillong Township (NST)-o donggipa Mawpdang-Mawkhanu-ona apjitangna gita Sombar salo, a·dokni Cabinet ra·chakangaha.
Iani bidingo a·dokni Home Minister Lahkmen Rymbui-ni parakatani gitade, sorkarini administrative building-rangko ua biapona apjitangna gita a·dok sorkari, NST-o acre 807.78-mangni gita a·arangko ra·gen.
“Shillong songjinmao biaprang namen apchangketengahani gimin NST-ko dal·batatna gita chinga ia administrative building-rangko ua biapona apjitskana tik ka·aha,” ine Rymbui aganaha.
Ia building-na pangchakaniko re·baenggipa January 21 tariko, a·dokni bilsi 50 gapaniko maniani bak gita a·dokni Chief Minister Conrad Sangma songe on·anggen ineba Home Minister parakataha.
Cabinet-ni tom·anio Early Childhood Development Mission-koba a·dok sorkari ra·chakangaha ineba Rymbui parakataha.
Home Minister-ni parakatani gitade, bi·sarangna chonaonin namdapatanirangko ra·bana miksonganio sorkari, ia mission-ko ra·chakaha aro ia mission-ko Social Welfare department, Education department aro dingtang dingtang dolrang jako ra·anggen.
Ia mission-ni ning·o bi·sarang, an·seng baljokani aro lekka poranirangko man·gen ineba ua aganaha.
Meghalaya a·doko dam 1500-na baten ICDS Anganwadi program-ko man·gijagipa songrang gnang ine talataniko on·angengon, ia mission-chi sorkari, chongipa bi·sarangna nambate nirok sandianirangko on·na ka·dongenga ine Rymbui parakataha.
Atchidaldaloni bilsi 6 ong·gipa bi·sarangoni lak 4-na baten bi·sarang ia mission-ni namgniko man·gen ineba Rymbui parakataha.
