SHILLONG: Meghalaya a·doko COVID-19 man·giparang batrorobataiengahaoba a·doko lockdown-ko ra·gatani gimin sorkari chanchia dongkujaenga.
Mongolbar saloba Meghalaya a·dok gimiko sak 275 manderang, COVID-19-ko man·daptaiahachim.
A·dokni Deputy Chief Minister Prestone Tynsong-ni parakatani gitade, batanggimin bilsirangoba lockdown-rangko ra·gatani a·sel manderang neng·nikanirangko chagrongna nangtokengahani gimin da·o dipet sorkari, lockdown-ko ra·gatna nangnikkujaenga.
“Lockdown-ko ra·gatgenchimode kangal cholgrirangsan ong·aigija pilakan neng·nikanirangko chagrongna nangtaigen ine niksamsona man·engani gimin da·o dipet chinga lockdown-ko ra·gatna nangnikkujaenga. Indake ong·genchimoba, chinga a·dokni pilak biaprangon mikrake kamrangko ka·enga aro manderangna ia kenbegnigipa sabisini bidingo mikrakatanirangko on·na jotton ka·enga,” ine Tynsong aganaha.
Lockdown-rangko ra·gatna nangjana gita sorkarini dongimin niamrangko ja·rikchina aro tikarangko su·e ra·china gitaba ua a·doko songdongenggipa manderangko didiataha.
Indake ong·engon, Assam aro gipin a·dokrango tika su·kugijagipa manderangna curfew-rangko ra·gata gita Meghalaya a·dokode curfew-rangko ra·gatna gita sorkari nangnikjaenga ineba a·dokni Deputy Chief Minister parakataha.
Assam a·dokrangode tika su·kugijagipa manderangkode noktangtangoni ong·katna on·jaengachim ine nikna man·a.