BAGHMARA: South Garo Hills a·jani headquarter Baghmara-o salgittamna ong·atenggipa Tyisam Festival-ko Budbar salo, Rongara-Siju-ni MLA aro Meghalaya State Health Advisory Board-ni Chairman Rakkam A Sangma, a·bachengate on·angaha.
Ia Tyisam festival-ko a·bachengate on·angani somoio Sangma, jinmana aganprakangengon, a·dokni Chief Minister Conrad K Sangma-ni dilanichi MDA sorkarini ra·gatgipa dingtang dingtang kamrangni gimin aganangenba, bilsi 5-oni bilsi 10-ni gisepon South Garo Hills a·jaoba namroro silroroaniko nikna man·gnok ine parakangaha.
Bading chiwale cha·enggipa aro game ge·e cha·enggiparangna sorkari dingtang dingtang cholrangko on·engon, mikkangchi an·tangtangna pangkamgipa janggi tangani cholrangko dake ra·na gita an·tangtangni changa sapani aro u·i-ma·sianirangko jakkalchina gitaba Sangma didiangaha.
A·songni pilak biaprangon sajinmani a·sel neng·nikanirangko chagrongna nangtokengoba ia Tyisam Festival-ko salgittamna ong·atengani gimin ua dingtangmancha South Garo Hills a·jani district administration-koba mittelpilangaha.
Ia Tyisam Festival-ko Meghalaya a·dokni bilsi 50 gapaniko maniani baksa ong·atenganiara Meghalaya a·dok gimiko dal·batsranggipa maniani gita ong·enga ineba Rongara-Siju MLA aganaha.
Ia Tyisam festival-ko ong·atanio dingtangmancha District Expo 2022-koba apsan biapon ong·atjolenga.
Ia festival ba manianio attamantian Garo Hills-ni dingtang dingtang biaprangoni git ring·anina mingsing minggamako man·gipa manderang re·bae, manderangko an·saoatenga aro uamangoni mitamranga, Muz, Black Jack aro gipinrang ong·a. Una agreba ia manianio chio kal·susaanirang, jatni kal·susaanirang, git ring·susaani, chroksusaani, dakmesoksusaani, bijak song·susaani, fancy dress, flower, vegetable & fruit show, baby show aro uandakgipa gipin program-rangkoba ong·atenga.
Ia Tyisam festival-o South Garo Hills a·jani Directorate of Information & Public Relations (DIPR)-ni gita photo exhibition-koba ong·atenga, jeon Meghalaya a·dokko man·na skang aro a·dokko man·ani ja·man ka·gipa noksarangko mesoke golporangkoba tarie mesokjolenga.
Ia Tyisam festival-ko re·baenggipa January 21 tariko, Meghalaya a·dokni bilsi 50 gapaniko manianichi matchotatgen.
Baghmara-o sal 3-na ong·atanggipa Tyisam Festival-ko a·bachengata
Date:
Share post:
