Dolgittam regional committee-ni recommendation-ko Cabinet ra·chaka

SHILLONG: Assam aro Meghalaya a·dokni simarango meligrikgijaniko namatna gita sorkari songe on·gipa dolgittam regional committee-rangni recommendation-ko Budbar salo, Meghalaya Cabinet ra·chakangaha aro da·o ia recommendation-rang baksana Assam sorkarini recommendation-ko a·dok damgnini sorkarirang, Bristibar attamo, Union Home Minister Amit Shah-na on·egnok.
Regional committee-rangni recommendation ba ku·pattianirangko ra·chakani bidingo kobor ra·timgiparangna u·iatengon, a·dok damgnini simarango meligrikgijanirangko namatna kam ka·anio itihasko nian baksana manderangni nangnikanirangko nina nangchongmota aro bang·bata kamrangon manderangni nangnikani gitasa a·dok damgnini sorkarirang ja·kuko de·aha ine Chief Minister Conrad Sangma parakataha.
Jatni daka rikaniba mongsonggipa cholrangoni mingsa ong·a aro darangba darangkoba badiaba a·dokona re·badraatna man·ja ine dolgni sorkarirangan nikesa ja·kuko de·aha ineba Sangma aganaha.
Chief Minister-ni parakatani gitade, sorkarini songe on·gipa sorkarirang, a·dok damgnini simarango meligrikna man·jaenggipa damdok jolni dam 36 songrangona re·ange am·sandianirangko dakaha.
Mikkangchi ja·ku de·angna sienggipani bidingo janapangengon, uamang Bristibar salo New Delhi-ona re·ange Union Home Minister-ko grongegnok aro regional committee-rangni ku·pattianirangko a·dok damgnian ra·chakmanahani gimin report ge·sanko Union Home Minister-na on·anggnok ine Sangma parakataha.