TURA: Tura-o chu dokkan damsani manager-ko ma·sina man·gijagipa mande sakgni, kragija dake dokani a·sel ia mandeni gingting bretna nangaha ine kobor on·aha.
Kobor on·ani gitade, ia a·sel ong·ani re·anggipa January 18 tarik attamni 7:45 bajimango, Tura Nakam Bazar-o donggipa chu dokkan damsao ong·aha.
Ia mande sakgni, ia chu dokkanoniko chu dabie ra·na jotton ka·on, man·jahani gimin uamang dokkanni manager-ko kragija dake dokaha aro ia mandeni gingting bretna nangaha. Ia a·selni bidingo chu dokkanni manager, salgipino police-rangna FIR ka·angaha.
Ia chu dokkanni licence-ara saksa Carnolia Sangma minggipa mandeni bimingo ong·achim aro manager-ni FIR-o parakani gitade, January 18 tarik attamni 4:30 bajimango, chadambe sakgni, AS-01 1896 motorcycle-o Nakam Bazar-o donggipa chu dokkanona re·bae, chu te·sako tangka gamgija ra·e katangaha. Ja·mano uamang changsa ia apsan dokkanonan re·bataie ia dokkanoniko chuko dabitaiaha.
“Chinga indinan noksan ong·na nangengani gimin anga uamangna chuko on·na jechakaha aro uamangna chuko on·na jechakon uamang rang·san angko chadrapna a·bachengaha aro angni gingtingko bretpile dokaha. Uamangni iandake chadrapani gimin anga maming chol dongjae bakan ua biaponi kataha aro sepangbatgipa police station-ona re·ange ia a·selni bidingo badi ka·eaha,” ine chu dokkanni manager Deepak Gupta aganenba, uko chadrapgipa chadamberangni kosako rakgipa ja·kurangko de·china dabiangaha.
Ia manderangko ua nikronggenchimoba bimingrangko man·ja ineba Gupta aganaha.
Gupta-ni FIR ka·ani gitade, ia manderangara Tura jillani Shantinagar joloni ong·achim.
Iani bidingo West Garo Hills a·jani SP Vivekanand Singh-o sing·sandiaton, police-rang ia a·selni bidingo am·sandina a·bachengataha ine ua parakataha.
