M’laya a·dokni bilsi 50 gapanio a·songni PM-ba namgipa skaniko on·a

SHILLONG: Meghalaya a·dokni bilsi 50 gapanio India a·songni Prime Minister Narendra Modi-ba, a·dokni manderangna an·tangni namgipa skaniko parakataha.
A·dokni namroro silroroanina on·gilanggipa pilaknan ia salo ua mittelpilanikoba parakataha.
An·tangni Prime Minister ong·ani ja·man Shillong-o ong·atanggipa North Eastern Council Meet-o uni bak ra·na re·baaniko gisik ra·atpilangengon, uan bilsi 30-40-mangni ja·man a·songni Prime Minister ong·e Meghalaya a·dokona re·baani ong·aha ine Prime Minister Modi parakataha.
Samtangtango ong·telaigiparang baksa janggi tangrimgiparang ine an·tangtangni dingtang ong·aniko bilakbataha ine Meghalaya a·doko songdongenggipa manderangko mittelpile aganangengon, “Meghalaya a·dokan, samtangtango ong·telaigiparangni gimin, namroro silroroani gimin aro samtangtangko ripinge rakkiani gimin a·gilsakna dakmesokgipa ong·aha,” ine Modi aganaha.
A·doko ‘Ku·simitgipa Song’ aro songantion choir dolrang dongani gimin janapatengon, a·doko ma·manti changa sapani aro doka dam·anirango bang·en on·gilahani gimin Prime Minister, mittelpilaniko parakataha.
A·doko changgipa sapgipa manderang bang·en gnang aro ia changa sapanirangko Shillong Chamber Choir, chubata gadangona ra·angaha ineba PM Modi aganaha.
Meghalaya a·doko ma·manti kal·susaanirango changgipa sapgipa manderang bang·en dongani gimin India a·song, Meghalaya a·doko ka·dongchakna man·enga ineba ua aganaha.
Meghalaya a·doko ong·telaigipa a·salrangchi gama ge·ani gimin mingsing minggamna a·bachengengaha ineba Prime Minister aganaha.
Indake ong·engon, a·doko rama jal·langrangko nambatatna, rel ramarangko tarina aro bangbang gita re·a doani cholrangko on·na sorkari kam ka·enga ineba Prime Minister parakataha.
Ma·mong sorkarini ra·gate on·gipa dingtang dingtang scheme-rangni gimin janapatengon, ia scheme-rangko manderangona sokate on·na a·dok sorkari kam ka·enga aro ma·mong sorkarini PM Gramin Sadak Yojana, National Livelihood Mission aro uandakgipa scheme-rangoniko Meghalaya a·doko namgnirangko man·aha ine Prime Minister Modi parakataha.
2019 bilsio Meghalaya a·doko chi pipe-rangko man·gipa nokdangrang 1 percent-sanchim indiba da·alo Jal Jeevan Mission-chi a·doko chi pipe-ko man·gipa nokdangrang 33 percent gapengaha ineba PM Modi parakataha.
Drone-rangchi tikarangko sokate on·gipa a·dokrangoni Meghalaya a·dokba skanggipa ong·aha ineba Prime Minister parakataha.
Mikkangchi a·doko namroro silroroaniko ra·bana gita ua pilak nanga dakchakanirangko on·angkugen ineba bon·kamao Prime Minister, ku·rachakaniko on·angaha.