SHILLONG/TURA: January-ni 21 tariko Meghalaya a·dokni bilsi 50 gapaniko a·dokni skotong Shillong songjinmao aro a·dokni pilak biaprangon maniangaha indiba COVID-19 sajinmani giproroaniko champengna dongimin niamrang dongani gimin ia salko chonesa maniangtokaiaha.
Meghalaya a·dokni Chief Minister Conrad K Sangma, gitoko saaniko man·engani gimin Shillong songjinmao mongsonggipa tom·bimonganiko ong·atanio bakko ra·epana man·jaha aro uandaken uni biapo, a·dokni Deputy Chief Minister Prestone Tynsong aro Assembly-ni Speaker Metbah Lyngdoh, mongsonggipa sokgiparang ong·e bakko ra·angskaaha.
Ia salko manianio a·dokni Chief Minister, bakko ra·epana man·jahaoba video conference gita a·dokni manderangna aganprakatskaaha aro a·dokni bilsi 50 gapaniko nikna man·ahani an·tangni kusi ong·aniko parakatan baksana a·doko songdongenggipa pilaknan an·tangni namgipa skanikoba on·angjolaha.
Meghalaya a·dokni bilsi 50-na re·mikkanganio pilakni gitan on·gilanirangko dake a·dokko niksengatgipa manderangko mittelpilangengon, bilsi 50-na skang, a·dokko man·na krengdilanggipa pagitchamrangni kamrangkoba ia salo Chief Minister gisik ra·atpilaniko dakangaha.
Mikkangchi a·dokni re·mikkanganio a·doko pangkamgipa namroro silroroaniko ra·bana gita a·doko songdongenggipa pilak manderangkon ku·cholsan ong·e kam ka·china gitaba ua didiangaha.
2030 bilsini gisepon Meghalaya a·dokkoba a·songo nambatsranggipa dam 10 a·dokrangoni damsa ong·atna gita uni sorkari miksonge kam ka·enga ine janapatengon, iana uni sorkari 2020 bilsionin dingtang dingtang ja·kurangko de·e kamrangko a·bachengaha aro batanggimin bilsibrini gisepon a·doko bewal kamrangkode namdapatna man·engaha ine Chief Minister parakataha.
Meghalaya a·dokni bilsi 50 gapaniko maniani bak gita ia bilsini gisepo matchotatna sienggipa kamrangni gimin janapatengon, sorkarini jako ra·e ka·enggipa bang·a kamrangan matchotna siengahani gimin ia kamrangoni bang·batakon ia bilsini gisepon oprake on·anggnok ine Sangma parakataha.
Chief Minister-ni parakatani gitade, ia bilsio matchotna sienggipa aro oprake on·na sienggipa kamrangoni mitamranga, Mawdiangdiang-o rikenggipa gital Assembly nok, Shillong-o rikenggipa International Centre for Performing Arts, West Garo Hills a·jani Ganol Hydro Power Project, Tura-ni PA Sangma Football Stadium, West Jaintia Hills a·jani Wahaijer Stadium aro Shillong-ni JN Stadium, Mairang-Ranigodown Azra rama, Rongram-Phulbari Hill rama, Dawki-Bholaganj rama, Bajengdoba-Resubelpara-
Ia bilsini gisepo a·bachengatna sienggipa project-rangni gimin janapatskaengon, ia bilsio a·dokni bilsi 50 gapaniko maniani bak gita New Shillong Township-ni Mawpdang-ona apjitangenggipa administrative building-rangna pangchakaniko songani, Tura, Williamnagar, Jowai aro Nongstoin jillani ning·o ramarangko tariani aro uandakgipa dingtang dingtang kamrangko sorkari a·bachengatgnok ine Chief Minister parakataha.
A·dokni bilsi 50 gapaniko Shillong songjinmao manianio dingtangmancha Meghalaya Day award-rangkoba on·angaha aro ia award-rangko man·gipa manderangara, U Tirot Sing Award-ko Benedict Shkemlang Hynniewta, Pa Togan Sangma award-ko Father Charles Ch Sangma aro U Kiang Nangbah award-ko Halen Nongtdu ong·a.
Ia salko manianio Shillong Chamber Choir-ba, gitrangko ring·e a·doktangna rasongko on·angaha.
Meghalaya a·dokni bilsi 50 gapaniko Tura-oba chone District Administration-ni gita Tura DC Park-o manidilangaha aro ia manianio a·dokko man·na krengdilanggipa pagitcham ma·gitchamrangna aro gipin dilgiparangnaba mande ra·pilskaaniko dakangaha.
South Garo Hills a·jaoba a·dokni bilsi 50 gapaniko Baghmara-ni Capt Memorial Govt College-o maniangaha aro ia salko manianio dingtang dingtang program-rangkoba ong·atangaha. Baghmara-o a·dokni bilsi 50 gapaniko maniani bak gita re·anggipa January 19 tarikonin Tyisam Festival-koba Simsang chibima rikamo ong·atangaha aro ia festival-ko ong·atanio dingtang dingtang program-rangkoba ong·atangaha.
East Garo Hills a·jaoba a·dokni bilsi 50 gapaniko Williamnagar-ni DC office-o donggipa Multi Purpose hall-o manidilangaha aro ia manianio East Garo Hills a·jani Deputy Commissioner Swapnil Tembe, jinmana aganprakangengon, a·dokni bilsi 50 gapaniko nikna man·aniara a·doko songdongenggipa pilak manderangnan namen rasong gnangbeani ong·aha ine parakangaha. Mikkangchi a·doko namroro silroroaniko ra·bana gita pilakkon apsan nangrime kam ka·china gitaba ua a·jao songdongenggipa manderangko didiangaha.
