AMPATI: South West Garo Hills a·jao gnigipa changna election-ni bewalo COVID-na tika su·ani Bristibar salo matchotaha.
South West Garo Hills a·jao songdongenggipa manderangna COVID-19-ni tikarangko nambate su·na man·na gita re·anggipa January 19 aro 20 tarikrango salgnina, SWGH a·jani District Administration, District Medical & Health Office aro gipin department-rang baksa election-ni bewalo, dingtang dingtang polling station-rango aro songchi nokchi re·enba dingtangmancha program-ko ong·atangahachim ine nikna man·a.
Ia salgnina tika su·ani program-ko ong·atanio tika su·kugijagipa sak 13,816 manderangoni sak 4,872 manderang tikarangko su·e ra·rikaha aro ia salgnio tika su·ani 35% gapaha ine official-rang u·iataha.
Re·anggipa January 3 tarikonin bilsi 15-oni bilsi 18 ong·gipa chadamberangnaba tika su·aniko a·bachengatahani gimin SWGH a·jao salgnina ia tika su·ani program-ko ong·atanio chatro chatrirangoniba bang·en tikarangko su·e ra·riktokaha aro uandaken ia bilsini gisepo ong·gipa chadamberangba gimik sak 919 chadamberang tikako su·e ra·rikaha ine u·iataha.
Ia salgnina tika su·anio bilsi 18 aro una batgiparangoniba sak 3,953 manderang tikako su·e ra·rikaha ineba kobor on·aha.