Koilani mamlao gimik politician-rangan matnanga man·a kraa: Kharlukhi

SHILLONG: A·doko niamgri koila cho·a ba salrurani mamlao gimik politician-rangan matnanga man·a kragiparang ong·toka ine NPP State president aro Rajya Sabha-ni MP, Dr WR Kharlukhi aganaha.
“Gimik politician-rangan sorkario dongaha, congress, gipin party-rang aro anga an·tangko man·gope gimik politician-rangan matnanga man·a kraa. Opposition-ni dilgipa Dr Mukul Sangma da·ode, niamgri koilao kam ka·giparangko matnangenga, ua an·tangba skangde bilsichetna chief minister ong·achim, ua somoio uni kam ka·aniko nipilatna nanga, ine Kharlukhi aganaha.
“Opposition-o donge, agana nanggnirangko agangija jrip dongaina nanga inede aganja, indiba niatgenchimode chinga politician-rangan maming ja·kuko de·jani gimin matnanga man·a krachong·mota. Opposition-o donggipa ruling ba bilo donge kam ka·gipa sorkariko matnanga, apsan daken sorkariba mamingkon ja·ku de·ja, uni gimin politician-kon matnangna kraa, iandakgipa  mamlao jinma apsan ong·e saksa sakgpinni kattako knachakgrike chanchirimna nanggen.”
“Ua joloni mande ong·pae, kamaipaani gimin, maina chingko champengenga ine chanchipaa. Environmental ba samtangtango donggiparangna namgijako ra·baa ine janape champenga aro da·ode coke plant a·bachengskaha, janggi tangna gitade cholko bikote kamko ka·na nangaia. Niamgri koilao kam ka·aniko chakpaenga ine ong·ja, indiba koila bikotna skangde ua jolni manderang bilongen cholgri ong·achim, jensalo koila bikotani gimin u·ibaaha aro kam ka·na sapaha, an·tangtangna kamaie janggi tangani cholko u·ie ra·aha, indiba da·o tanggitik champengataniara uamangni janggi tanganiko dingtangata, ineba Kharlukhi agandapaha.
“Koila cho·aniko bon·e-chonnede bon·atna man·jawa. Ia mamlao sorkari, NGT aro manderang apsan asonge chanchirime cholko bikotna nanggen. Jillani manderang, koila cho·aniako niamgri ong·a ine altuen agana, indiba kam ka·e cha·giparangni gimin name dake chanchiate nibo aro uamangna janggi tangna gipin cholko on·skana nanggen.”
“Order ba ge·etaniko on·na altubea. Indiba champengataniara, kam ka·giparangna maidakgipa obostako ra·baa, iako nichengna nanga. Iarang gimikko nigrike kam ka·na nanggen, ine Kharlukhi aganaha.