SHILLONG: Meghalaya aro Assam a·dokni simarango meligrikna man·jaenggipa damdok jolrangko namatna ja·ku de·anirang matchotangengahaon, bangki dongkuenggipa gipin damdok jolrangkoba namatna gita ja·kurangko de·chakatchin United Democratic Party (UDP)-ni president Metbah Lyngdoh, a·dok sorkariko didiangaha.
“Meghalaya aro Assam a·dokni chief minister-rang, adita salrangna skangsan Union Home Minister Amit Shah-ko gronge meligrikna man·jaenggipa biaprangni bidingo agangrikeahani gimin anga kusi ong·a. Ian namgipa ja·ku de·ani ong·enga,” ine Lyngdoh aganaha.
A·dok damgnini simarango meligrikgijanirangko a·dok damgnian nama bewalo namatpilna ja·ku de·ani bidingo Meghalaya a·dokni Chief Minister Conrad Sangma aro Assam a·dokni Chief Minister Himanta Biswa Sarma, adita salrangna skangsan Union Home Minister Amit Shah-ko gronge agangrikeahachim.
“Ia neng·nikaniko namatna sorkarini kam ka·anio chingaba sorkarina chakpaaniko on·enga. Chief Minister-ni dilanichi a·dok sorkari, ia neng·nikaniko namatna gita gisiko nangen kam ka·enga,” ine Lyngdoh aganaha.
Meligrikna man·jaenggipa biaprangona re·angen am·sandianirangko dakahani gimin aro an·tangtangni ku·pattianirangko sorkarina on·ahani gimin ua dolgittam regional committee-rangko dilgipa a·dokni Deputy Chief Minister Prestone Tynsong, Urban Affairs Minister Sniawbhalang Dhar aro PHE Minister Renikton L Tongkhar-koba mittelpilangaha.
Indake ong·engon, sorkarini kamrangna dorgasto galenggipa chadamberangna upper age limit ba dongimin bilko bilsi bongachi bariatna bi·aniko ra·chakahani gimin UDP-ni president, a·dokni Cabinet-ko mittelpilangjolaha.
“UDP-ni ku·rang on·enggipa kamrangoni iaba mingsa ong·achim aro chinga iani bidingo Chief Minister-ko changsa grongenba, chingni mol·molaniko knachakchina mol·molahachim. Ia mol·molaniko Cabinet ra·chakahani gimin chinga namen kusi ong·a,” ine Lyngdoh aganenba, ian a·dokni chadamberangna namgni ong·gnok ine parakataha.