TURA: A·song gimikon COVID-19-ni Omicron rokomko man·giparang batrorobaengahani gimin South West Garo Hills a·jaoba ia sabisini batrikrikaniko champengsona gita Sombar saloni a·bachenge re·baenggipa January 31 tarikona kingking dingtang dingtang niamrangko South West Garo Hills a·jani District Magistrate ra·gate on·angaha.
District Magistrate-ni u·iatani gitade, a·ja gimikon jinma tom·anirangko champengataha indiba bia ka·anirangode district administration-oniko permission ra·chenge nokrango 50 percent-na batgija aro bangbanggipa biaprangode sak 100-na batgija tom·na man·gen. Mande sianirangode district administration-oniko permission ra·chengenba sak 50-na batgija tom·skana man·gen.
Gipin a·dokrangoni South West Garo Hills a·jaona re·napbaenggipa manderang, chu·gimik tikarangko su·mangimin ong·genchimoba konta 72-ni gisepo porikka ra·e negative ong·ani report-ko on·na nanggen aro report on·gijagipa manderangde nakuramo porikkako ra·e porikkani result-ko man·kujaskal dingtang nape dongna nanggen.
Private garirangba salsa even nomborchi bon·gipa garirang aro salsa odd nomborchi bon·gipa garirang re·rurana man·gen aro uandaken Sombar salo odd nombor aro salgipino even nombor dake ja·rikangna nanggen.
Noktangtangoni ong·katengon, mask-rangko ganchina, saksa sakgipinoni chel·tanggrike dongchina aro jakrangko rongtal an·tale rakkichina gitaba DC u·iataha aro tika su·na chol man·enggipa pilak manderangkon tika su·e ra·china gitaba ua u·iataha.
Walni 10:00 bajioni pring 5:00 bajionade night curfew ong·engani gimin ia somoirangode darangba re·rurana man·jawa ine SWGH a·jani District Magistrate u·iataha.