SHILLONG: Re·baenggipa 2023 bilsini Assembly election-o Khasi aro Jaintia Hills a·jarangode United Democratic Party (UDP) aro National People’s Party (NPP) dolni giseposa susaani ong·batgen ine UDP-ni general secretary Jemino Mawthoh parakataha.
“Angni chanchiani gitade, Khasi aro Jaintia Hills a·jarango Congress aro All India Trinamool Congress (AITC) dolrang name dakna man·jawa aro UDP, NPP dolni giseposa susaani ong·batgen,” ine Mawthoh, kobor ra·timgiparangna parakataha.
UDP general secretary-ni aganani gitade, re·baenggipa bilsini Assembly election-o manderang, UDP ong·jaode NPP dolkosa seokgen ine chinrangko nikna man·enga.
Ia dolgnioni badia chegipa ong·gen, ukode manderangsa seokgen ineba ua aganaha.
Meghalaya Democratic Alliance (MDA) sorkario bakrimenggipa dolrangoni NPP aro UDP dolrangan mongsongbatgipa dolrang ong·engachim ine nikna man·a.
Sak 12 MLA-rang, AITC-o napangani ja·man a·doko Congress dol bilgribataha ineba Mawthoh parakataha.
“Assembly election-na da·o bilsisamangsan dongaiahani gimin Congress dolna bilakbataina gita namen neng·ani ong·gnok. Uamang UDP aro NPP dolgninan maming nangchakeaniko ra·bana man·jawaha,” ine ua aganaha.
AITC dolni bidingo janapatskaengon, Meghalaya a·doko gital dolkode manderang ra·chakna somoi nangkugen, uni gimin AITC bilakna man·kujawa ine UDP-ni general secretary parakataha.
“A·dokni gitcham chief minister Dr Mukul Sangma dongani gimin Garo Hills-ode AITC name dakna man·naba gnang indiba Khasi Hills jolrangode manderang, AITC-ko Bengal-ni dol inesa ra·engkua,” ine Mawthoh aganaha.
