TURA: West Garo Hills a·jao donggipa Magurmari GA Secondary School-ni school managing committee (SMC)-ko maming niam grisa songaha ine matnangatenba, oa SMC-ko ra·galpilchina gita Shillong-o donggipa School Education & Literacy-ni Director-na sedoataha.
School Education & Literacy-ni Director-na sedoatgipa chittio Abdul Aziz Sk aro Abdul Hashan Sk minggipa manderangni parakatani gitade, ia skulni SMC-ko songna skang jinma tom·anirangkoba ong·atchengjahachim aro ia SMC-o chatro chatrirangni ma·a paarangkoba rimnapjahachim.
Iani bidingo ia manderang, skangoba DSEO-na badi ka·doangahachim indiba uamangni badi ka·ani bidingo maming ja·kurangko de·jahani gimin uamang School Education & Literacy-ni Director-na sedoatskaaha.
Indake ong·engon, ia skulni SMC-ko ra·galpilenba, ma·a paarang aro songni manderang baksa apsan nangrime gital SMC-ko songna ge·etaniko on·china gita ia manderang, School Education & Literacy-ni Director-ko didiataha.