SHILLONG: Indian Constitution-ni Sixth Schedule-ko taridapanio KHADC aro GHADC-na seat-rangko dam 40-ona bariate, JHADC-na dam 32 seat-rangko on·china Meghalaya sorkari proposal-ko tariaha ine Sukrobar salo, a·dokni Chief Minister Conrad Sangma parakataha.
Sukrobar salo Cabinet tom·a matchotani ja·mano kobor ra·timgipa manderang baksa agangrikengon, Sixth Schedule-ko taridapanio Khasi Hills Autonomous District Council (KHADC) aro Garo Hills Autonomous District Council (GHADC)-na dam 40 ka·e seat-rangko on·e, Jaintia Hills Autonomous District Council (JHADC)-na dam 32 seat-rangko on·china a·dok sorkari ku·pattianiko on·angaha ine Chief Minister parakataha.
Da·o dipet ia damgittam district council-rangon dam 30 seat-rang dongengpitichim aro ia dam 30 seat-rangoni dam 29 seat-rangnade election-ko ong·ate damsanade membor-ko nominate ka·e on·rongengachim.
Indake ong·engon, da·o GHADC aro KHADC-nade seat-rangko dam 40-ona bariatchina ku·pattianiko on·engahani gimin seat dambrinade membor-rangko songe, dam 36 seat-rangnade election-ko ong·atskagnok indiba JHADC-nade dam 32 seat-rangko ku·pattiengani gimin damgni seat-rangna membor-ko nominate ka·e dam 30-na election-ko ong·atskagnok ine Chief Minister parakataha.
Ia ku·pattianirangko a·dok sorkari, bakan ma·mong sorkarina on·atgnok ineba Chief Minister parakataha.
“District council-rangna seat-rangko chamani aro village council-ni gimin chanchianian Sixth Schedule-ko taridapanio bon·kamgipa chanchina nangani kamrang ong·engachim. District council-rangna seat-rangko chamani gimin chanchiion, KHADC aro GHADC-na dam 40 ka·e seat-rangko chamna aro JHADC-na dam 32 seat-rangko chamna sorkari tik ka·angaha,” ine Sangma aganenba, sorkarini ku·pattianirangko bakan ma·mong sorkariona watdoatgnok ine parakataha.
Chief Minister-ni parakatani gitade, Cabinet-ni tom·anio village council-rangko songani giminba chanchiangaha aro a·doko skangonin village council-rang dongani gimin secretary-ko man·chape village council gimikkon election ong·ate seokna tik ka·angaha indiba village council-ni chairman-de songni Nokma-Sordarrangan ong·aigen.
“Village council-ko songani bidingo chinga district council-rang aro dingtang dingtang dolrang baksa chanchirimani ja·manosa ia ja·kuko de·na manchiaha indiba ia ku·pattianirangoni mongsonggiparangde district council-rangoni ku·pattigiminrangan ong·a,” ine Sangma aganaha.