TURA: Garo Hills Automomous District Council (GHADC)-ni gital chief executive membor (CEM)-ko seokna gita Sombar pringo election-ko ong·atangaha aro ia election-o GHADC-ni gitcham Chairman Rakesh A Sangma, 15 vote-rangko man·e gital CEM-na seokako man·angaha.
CEM-ni biapna unbaksa susagipa gitcham CEM Benedic R Marak, 13 vote-rangkosan man·rikskaaiaha.
Gitcham CEM Benedic Marak-ni kosako NPP-ni MDC-rang, Sonibar salo no-confidence motion-ko ra·gatanio amako man·ahani gimin ua apsan salon kamtangko watna nangahachim.
Gitcham CEM-ni kam watangani ja·man gital CEM-ko seokna gita Sombar salo election-ko ong·atangaha aro ia election-ko ong·atanio GHADC-ni chairman Rakesh Sangma-ba kamtangko wate susaangaha aro bon·kamao NPP MDC-rangni pu·onanichi gital CEM-na seokako man·aha.
Gitcham CEM Benedic Marak-na All India Trinamool Congress (AITC)-ni MDC-rang aro BJP-ni MDC-rang chakpaaniko on·skaahachim.
Gital CEM Rakesh Sangma-na UDP MDC Ashahel D Shira baksana Trinamool Congress-oni ma·ekanggipa MDC sakgni, chong·motan Boldamgre-ni MDC Stevie Marak aro Shyamnagar-ni MDC Habibuz Zaman-ba NPP-ni MDC-rang baksa pu·onaha.
Gitcham CEM Benedic Marak-na Trinamool Congress-ni MDC-rang baksana Tura-ni BJP MDC Bernard N Marak aro Barengapara-ni BJP MDC Promod Koch-ba pu·onskaaha.
Ma·mong sorkarini chame on·atgipa tangka paisarangko gitcham CEM Benedic Marak, Executive Committee-o bakrimenggipa gipin membor-rang baksa agangrikchengronggija skatang jakkalaha ine matnangenba, NPP MDC-rang uni kosako chakatna a·bachengaha aro uandaken batanggimin antion saksku Executive Membor-rangba, EC-oni ong·katgrimahachim. Unbaksana dingtang dingtang committee-ni chairman sakgittamkoba CEM an·tangan ra·galate uamangni biapo AITC-ni membor-rangko donatskaahachim.
Iandakgipa obostarang ong·ani ja·man, gitcham CEM-ni kosako NPP MDC-rang, no-confidence motion-ko ong·aton, ua amako man·ahani gimin GHADC-ni gital CEM-ko seoktaina nangao ga·akaha.
Comments are closed.