TURA: Garo Hills Autonomous District Council (GHADC)-ni gitcham chief executive membor (CEM) Benedic R Marak-ni biapo gitcham chairman Rakesh A Sangma-ko seokskaahani gimin jegale, GHADC-o kam ka·enggipa manderang, Non Gazetted Employees Association (NGEA)-ni ning·o salgnina kamrangko ka·gija jingjengatangaha.
GHADC-ni gitcham CEM Benedic Marak, ma·mong sorkarini chamatgipa tangka paisarangko Executive Committee (EC)-ni gipin membor-rang baksa ku·monga gri gipin kamrangna jakkalskaaha ine matnangenba NPP-ni MDC-rang, uko CEM-ni biaponiko ra·ongalenba gitcham chairman Rakesh Sangma-ko CEM songskaahachim ine nikna man·a.
Indake ong·engon, GHADC-o kam ka·enggipa manderangna dormaharangko on·na gitasa GHADC-ni gitcham CEM Benedic Marak kamko ka·engachim aro uni biapo gital CEM-ko songaniara namen kragijani ong·enga ine dingtang dingtang NGO-rang, chong·motan GSU, FKJGP, ADE, AYWO, FAF, NTDF, TSCF, GGU aro NESO dolrang, GHADC-ni NGEA baksa jegale, gital CEM-ko ra·galpilchina dabitokskaengachim.
NGO-rangni jegalanio GHADC-o kam ka·enggiparangba bakrime, February-ni 1 aro 2 tarikrango ‘pen down strike’-ko ong·ate kamrangko ka·tokjaha aro gital CEM-ko ra·galpilchina dabiangtokaha.
GHADC-o kam ka·enggiparangni salgnina kamrangko ka·gija jingjengatani ja·man, NGO-rangba February 3 aro 4 tarikrango ‘Non-Cooperation Movement’ ba NCM-ko ong·ate ia gital CEM-ni kosako jegalanirangko dakanggen ine NGO-rang parakataha.