SHILLONG: Shillong Technology Park-ko kulianichi 1500-na baten kamrangko ong·katatgen aro ian Meghalaya a·dokko Information Technology (IT)-o teng·suatna gita chadamberangna cholko on·gen ine Budbar salo, Shillong Technology Park-ko kulie on·angani somoio, a·dokni Chief Minister Conrad K Sangma parakataha.
Shillong Technology Park-ko kulie on·angani somoio Chief Minister baksana a·dokni Information Technology & Communication (IT&C) Minister Hamletson Dohling, PHE Minister Renikton Lyngdoh Tongkhar aro dingtang dingtang sorkari officer-rangba dongpae bakko ra·angahachim.
Ia Shillong Technology Park-ara, 2022 bilsini gisepo Meghalaya a·dokni bilsi 50 gapaniko maniani bak gita a·bachengate on·angenggipa ming 300 project-rangoni mingsa ong·a ineba Chief Minister ia tom·anio jinmana parakataha.
Chief Minister-ni aganani gitade, da·o a·doktangon Technology Park-ko kuliahani gimin dingtang dingtang biaprango donge kamrangko ka·enggipa IT-ni manderangnaba a·doktangona re·bapile kamrangko ka·e cha·na chol ong·gnok.
Meghalaya a·doko aro mongsongbate Shillong songjinmao 5 star hotel-rangko bang·en kulina siengahani gimin ia IT-ni a·bao u·i-ma·sigipa manderangnasan ong·aigija gipin chadamberangnaba kamrangko ka·e cha·na chol ong·gnok ineba Chief Minister aganaha.
Chittagong Port-oni Shillong Technology Park-ona submarine cable-ko ra·bana gita miksonganio uni sorkari, India aro Bangladesh sorkarirang baksa agangrikenga ineba ia tom·anio Sangma parakataha.