6th Schedule amendment-ko donaikuchina Coucil, Indiani President-ko agana

TURA: Sixth Schedule Bill-ko taridapgiminko ra·chakgija rakkie donaikuchina gita didienba, Garo Hills-ni Council of Nokmas, Indiani President Ram Nath Kovind-na seachi u·iataha, jekon Meghalaya Cabinet ra·chakahachim aro ru·utgijan Ma·mong Sorkariona watatgnokchim.
“Chinga, Garorang Meghalayani mongsonggipa jat ge·gittamoni ge·sa ong·a, jekon ‘Abi gittam ine mingsinga’. Abigittamoni sakantian an·tangtango ge·prak Autonomous district council-rang donga, indiba uamangni gisepo Garo-rang mangmangsan GHADC-o bakko ra·na gita apsan chol aro jakgitelaniko gipin jatrangna on·a, jemangan MDC election-rango puonenga aro susatokenga aro pilakan jong-ada chane tom·tome janggi tangtokenga. Iarang ong·omangba chingni Nokmaship maming neng·nikani aro jajaatani grian apsanon dongenga,” Nokmarang aganaha.
Unigisepon, da·o taridapgipa Bill-ko ra·chakahaode Nokma-rangni bil aro kamrang bon·aignok, unigimin Garo Hills-ni manderangni namgnina taridapgimin amendment bill-ko indaken donaikuchina gita Nokma Council, Indiani President Ram Nath Kovind-ko didiataha.