SHILLONG: GHADC-ona seokatako man·gipa memborrango chu·sokatna gita bang·en ku·rachakgiminrang gnang, jerangkon skangonin chu·sokatna man·pilgnokchim. A·chik jatni bil aro mikkim rasongko aro pilak jatni dakbewalrangko ripingna aro chel·chakna kam ka·ani uamangni jakonchim ine All Garo Hills Joint Action Committee (AGHJAC), Tura, Council memborrangni kosako matnange aganaha.
Niam ainrangko tarianioba somoi gita kam ka·jani a·selan bon·kamaode A·chik A·chikskaan nanggrikaniona sokgen aganengon, A·dok Sorkariko mikrakatan baksa, GHADC-ni pilak MDC-rangkon, Codification of the Garo Customary Law (GCL), Implementation of Separate Electoral Roll (SER), Nokmaship Institution-ni bil aro kamrangko bilakbatatanani ta·rake kam ka·china gitaba AGHJAC didiataha.
Indake ong·gengon, ge·sa mangmang donggipa traditional instituin-ko bilake ripingna aroba Garo Hills-ni manderangni pilakni gitan namgnina kam ka·na re·ongkattokchinaba gita Committee, pilak A·chik MLA-rangko, MP-rangko aro a·gipi songdonggiparangko didiataha.
Indake ong·engon, ku·cholsan kam ka·chisan pilakkon chu·sokatna gita bil amani gimin, party-ni kamrangko janggilate, jatni namgnina re·mikkangenggipa kamrangko apsan kimkro chakpaaniko on·china gita AGHJAC, pilak A·chik jong-ada no-abirangko mol·molataha
Ma·mongni pilak tangka paisarangko royalty-ni tangkarangko namedake jakkalchina gitaba AGHJAC dabiaha, unigisepon Chief Minister aro CEM-ni ku·rachakgimin somoio da·oni GHADC CEM, staff-rangna dormaha on·na man·jaode uko CEM-oniko ra·ongalna nanga ineba AGHJAC aganaha.
