SHILLONG: A·dok sorkari, km-177 Dainadubi-Dalu road project-na Detailed Project Report (DPR)-ko tik ka·aha.
Iani bidingo talataniko on·aton PWD (Roads) Minister Prestone Tynsong, indine aganaha, “ma·mong sorkari ia road project-ko ta·raken matchotatna nangnikenga.”
“DPR-ko taria matchotjok, district gimikni collector-rang baksa tom·e chanchirimaha. Maina ramani project-na a·ako ra·na nanggen aro man·a dipetde ta·raken DPR-ko on·na jotton ka·gen,” ineba Tynsong aganaha.
Uandake ia project matchotahaon Garo Hills a·jani manderangna bilongen dakchakbeani ong·gen ine minister ka·donganiko parakataha. Una agreba North Garo Hills, East Garo Hills, South aro West Garo Hills-ni gisepo nambatgipa ramako on·gen.
Minggipin da·ode ia project-na a·ao man·a ra·bianirangko chagrongenga, maina mitam a·a nokgiparang a·ako on·na siktokjaenga. Indiba mikkangchi iandakgipa ra·bianirangko ta·raken namatna jotton ka·gen ineba minister parakataha.
