Rongjeng Model Degree College-ko name rikjani gimin NGO-rang jegalgrima

TURA: East Garo Hills-ni Rongjengo rikenggipa Rongjeng Model Degree College-ko name rikjani gimin chong·motan namgipa bosturangko jakkale rikijani gimin NGO-rango ong·katgrime rally cum signature campaign-ko dake jegalanirangko dakangaha.
Ia rally-ko, GSU, ASWA, FKJGP, AAYF aro GSMC dakgiparangko man·chape dingtang dingtang NGO-rang ong·ataha, indake Rongjeng C&RD Block-ni ning·ogipa Darugre-o rikenggipa Rongjeng Model Degree College building-ko nambregijagipa bosturangko jakkalenba rikaniko raken jegalangaha.
Jegalenggipa songni manderang aro NGO memborrang ja·mano, building rikna tikka ra·gipa Rakesh Sangma-ko matnangenba uni bimangko tarie so·e galaha.
Mijalo jegalaniko dakanio Rongjeng jolni ritcha manderang bakko ra·angaha, jeon joltangni dilgiparangkoba jingjengatanio bak ra·aniko nikna gita man·aha. Ia buildingko dam komiani bosturangko jakkalenba rikani gimin ian iano poraigipa chatro chatrirangna kenchakani donggen ine NGO-rang jegalaha. NGO-rang re·jome jegalanikoba dakangaha.
Dam komiani bosturangchi building-ko rikani gimin contractor-ni kosako nirokatchina gita NGO-rang, unaskangoba East Garo Hills-ni deputy commissioner Swapnil Tembe-na badi ka·eahachim. Komia damni bosturangko jakkale ia building-ko rikaha aro plaster ka·giminrang da·o tang·galenga, uandake dingtang dingtang a·selrangko NGO-rang janape seenba DC-na mija Mongolbaro badi ka·aha.
NGO-rangni aganani gitade, buildingko rika matchotani da·o ja gittamsan ong·engkuon, nokking ba slab da·on bretsriengaha.
“Chingni sandie nikani gitade, nokking ba slab-ko namedake tarijaha, an·chengna agrede cement-kode nikna neng·aha, nokkingko repigipako jakchin tikkotna man·aia. Plaster-ba name ka·ja, jekon chel·aoniba ma·siatsrangaia,” organization-rang aganaha.
Uamang indakeba aganaha je iako namgija rikani mingsa ja·pangde uamangni rikmingo engineer-ni re·ange nirokgijani giminba ong·aha.
Unomitingo, building-ko namgija rikanio jak donggipa sakantini kosako bichal ka·china aroba building-ko namedake tik ka·e on·china gita NGO-rang, Deputy Commissioner-o dabiaha.
Nokrik nokdaka namgija gimin, building-ko rikmitingon NGO-rang aganachim. Indake ong·genchimoba uamangni agananirangko knachakjaha, uamangni kattako knachakjani giminan ia a·selrang ong·aha ineba organization-rang aganaha.