AMPATI: District-o, niamni a·palo kam ka·anirangko champengatna gita South West Garo Hills-ni Additional Deputy Commissioner S.K. Marak, under Section 144 Cr.PC-ko ra·gatataha. Rama sorokrang gita manderangni songre-songbatanirango darangchiba maming ja·donggaataniko man·jana gita iako ra·gataha. Indake ramarango aro je biapoba manderang sakbongana bate tom·dakna man·jawaha, siatgnigipa bosturangko ra·bite roramna aro ramrangko champenge donna gita man·jawaha ine mikrakataniko on·aha.
February 8 tarikoni February 11 tarikona kingking Garo Hills gimikon attam 8 bajioni pring 5 abjiona, toprimgimin NGO-rangni walo rama champengataniko dakengani gimin district administration 144 CrPC-ko district-o ra·gatataha. Garo Hills Autonomous District Council-o Rakesh Sangma-ko CEM-na seokaniko jegalenba, uko ra·galchina dabie, NGO-rang walo rama champenganiko social media gita parakaha. Unigisepon, ia NGO-rang, ramarangko champengenba manderangni re·a doanirango ja·donggaataniko on·naba donga ine kenchakenba SWGH-ni administration, 144 CrPC-ko ra·gatatskaaha.
Indake ong·engon, ia ra·gatatgimin niam, gitalgipa order ba ge·etaniko on·taikujana kingking bilon dongangkugen, indake ong·genchimoba, security personnel, nanggitakana aro naljokatani kamrangna re·giparangna ia ge·etani nangchakejawa.
