SHILLONG: Meghalaya a·dokni Congress MLA-rang, manderangni namgninasa NPP-chi dilenggipa Meghalaya Democratic Alliance (MDA)-o bakrimaniko on·aha ine Congress Legislature Party (CLP)-ni dilgipa Ampareen Lyngdoh talataniko on·angenba, iani bidingo All India Congress Committee (AICC) ba Meghalaya Pradesh Congress Committee (MPCC), MLA-rangni kosako ja·kuko de·na man·jawa ine parakataha.
AICC ba MPCC baksa agangrikchenggija NPP-chi dilenggipa MDA sorkario bakrimahani gimin Congress MLA-rangni kosako AICC ja·kuko de·na miksongenga ine koborrangko man·soahani gimin ua ia kattarangko aganaha.
Lyngdoh-ni parakatani gitade, Congress dolni ning·o dingtangmancha dongimin niamrang gnang aro nangani kri MLA-rangba kamrangko ka·na bil dongachim.
Congress dolni sakbonga MLA-rang, re·anggipa January 22 tarikon, dingtang dingtang kamrango MDA sorkarina chakpaaniko on·na miksonge a·dokni Chief Minister Conrad K Sangma-ko grongeahachim ine janapatengon, MLA-rangni ja·ku de·aniko namnikjaenga ong·ode ua somoion Congress dolni dilgiparang, CLP-na seachi u·iatna man·achim ine CLP-ni dilgipa aganaha.
“Congress MLA-rangni MDA sorkarina chakpaaniko nangnikjaenga ong·ode ua somoion AICC ba MPCC chingna seachi u·iatna man·achim. Darangba CLP-ni bilko pe·na man·ja maina chingaba rubber stamp CLP ong·ja aro da·o dipet Congress dolo chinga MLA sakbongasan tange dongenggiparang ong·a,” ine Lyngdoh aganaha.
AICC-ni dilgiparangkode grongna gita somoirang man·rongja ine talataniko on·angengon, iani bidingo Congress dolni ning·on jera ra·grikaniko dakna nanga ine CLP-ni dilgipa parakataha.
“Chinga MLA sakbongako darangba nichanggalna man·ja. Na·simangde chingko Legislative Assembly-ona seokjaha indiba manderangsa seokaha. Na·simang chingni aganako knachakna jechakkugenchimode a·doko Congress dolni be·gruanioba na·simangan dai donggiparang ong·gen,” ine Lyngdoh aganaha.
MDA sorkario BJP-ba bak ong·paengani gimin sing·on, a·doko BJP-ni MLA sakgni sorkarini bak ong·paaniara uamangna maming neng·nikani dongjawa ine Lyngdoh parakataha.
“Chingni kosako ja·kuko de·genchimode uan Congress dolni kosako ja·ku de·anisa ong·gen, uni gimin chinga iako na·simangni jakon pakwatenga,” ine Lyngdoh aganaha.
2018 bilsini Assembly election-o tikitko on·ahani gimin uamang Congress dolko mittelpilna ska ine parakatengon, uamang darangba doltangko wate katjawa ine CLP-ni dilgipa talataniko on·angaha.
“Indiba na·simang chingko rim·kepe dongna man·jawaha aro chingko na·simang knachakgenchimosa Meghalaya a·doko Congress dolna namgni ong·aigenok,” ine Lyngdoh parakataha.